KOK DESKOBRE EMA SUBAR MAUK MORUK

Komando Operasaun Konjunta (KOK), deskobre ema balun maka durante ne’e fo apoiu no subar Mauk Moruk.

Atu bele hetan prova ema sira subar Mauk Moruk ne’e, F-FDTL ho PNTL liu husi operasaun HANITA, Tersa (02/6/2015), komesa ona halo operasaun tama sai uma iha area Leste nian (Baucau, Viqueque ho Lautem).

“Ami hala’o pasa revista sai uma para bele kaptura Mauk Moruk ho ema ne’ebe maka fasilita subar Mauk Moruk durante ne’e,” informa Vise Xefi Estadu Maior F-FDTL, Brigadeiro Filomino Paixão ba Jornalista iha Palasiu Prezidensial, Kuarta (03/06/2015).

Desde hahú operasaun tama sai uma, to’o agora KOK seidauk hetan Mauk Moruk nia ain fatin, tanba ema balun fasilita komunika ba malu ho teknolojia ne’ebe maka avansadu.

“Ha’u fiar katak, sei kaptura Mauk Moruk, maske iha ema balun maka fasilita lori no subar nia tun-sae” afirma Filomeno Paixão, hodi mensiona katak, kazu Mauk Moruk nian ne’e la’os ona politika, maibe tendensia liu ba krime organizadu.

Husi sorin seluk, Komandante Jeral PNTL Komisariu Julio Hornai hateten, operasaun tama sai uma laos lor-loron, maibe depende ba situasaun terenu.

“Se ita tama uma sai uma maka ema hotu la fo apoiu susar ita atu kaptura, importante ita hotu hanesan Timor oan ita hakarak estabilidade, ita fo apoiu ba malu para bele kopera ba justisa,” hateten Julio Hornai. avi

Suara Timor Lorosae