POVU TL SEI SUSAR KONSUMU NA’AN

Povu Timor Leste sei susar atu konsumu na’an, tanba nasaun ida ne’e sei depende maka’as liu ba sasan ne’ebé importa mai husi nasaun seluk.

Primeiru Ministru (PM), Rui Maria de Araújo hatete katak, folin na’an agora dadauk ne’e karun tebes ba povu atu bele konsumu, tanba ekonomia povu nian rasik mós seidauk diak.

“Ita nia familia sira iha Timor Leste, atu han na’an deit mós susar, na’an karau sira ne’e agora karun lahalimar, maibé laiha ema ida ne’ebé hakarak investe iha área pekuaria, atu dinamiza diak liu tan ita nia ekonomia,”informa PM Rui Araújo iha Palacio Governu, Tersa (03/6).

Nia esplika katak, la’os Estadu mak atu halo fali investementu iha fabrika na’an ka manutolu ida, ka fabrika hakiak karauk hodi bele produs na’an, maibé tenki mai husi investementu privadu.

Maibé Rui Araújo dehan, Governu hare hotu ona kestaun sira ne’e, no buka ona maneiras kona-ba, oinsa atu rezolve problema ida ne’e.

Nia haktuir, Estadu mós hare ona kona-ba, oinsa atu lori asesu ba kapital, tanba maske iha ona kuadru legal ida ne’ebé diak, maibé empregadores sira laiha asesu ba kapital, entaun sei susar nafatin.

Nune’e Governu liu husi orsamentu Jeral do Estadu, iha hela preparasaun atu halo banku dezenvolvimentu nasional, no dadauk ne’e Ministeriu Finansas halo hela estudu ba ida ne’e.

“Dadauk ne’e, Governu mós koalia hela ho parseirus balu ne’ebé interesante atu loke banku investementu iha Timor Leste. Ita hein katak, ida ne’e bele realiza iha fulan hira oin mai,”relata Rui Araújo.

Alende ne’e, PM Rui Araújo mós rekuñese katak, kona-ba turismu, atividade turisitika seidauk maka’as. Maibé Xefe Governu ne’e esplika, turismu iha mós relasaun ho área sira seluk hanesan, infraestrutura.

“Enkuantu ita nia estradas sira hanesan ne’e nafatin, sei susar tebes ita atu inpoint dinamika foun iha turismu. Enkuantu ita laiha investedores estranjeirus atu mai investe iha área ida ne’e, ita seidauk bele konsege atu halo buat brak iha área turismu,”tenik nia.

Nia esplika, klaru katak, Governu nia politika ne’ebé oras ne’e dadauk iha, koalia maka’as liu kona-ba turismu komunitariu. Maibé Rui Araújo dehan, atu dinamiza turismu komunitariu ne’e mós, persija investedor.cos

Jornal Nacional