KRITERIA 20 MIL MILITANTES HARII PARTIDU, PROVOKA KORUPSAUN POLITIKA

Kriteria hetan 20 mill militantes hodi bele harii Partidu foun ida, ida ne’e iha posibilidade atu provoka korupsaun politika iha nasaun foun Timor Leste.

Eis Prezidente Partidu Sosial Demokrata (PSD) Mario Viegas Carrascalão hatete katak, kuandu militante 500 deit, ema bele buka deit nia familia atu priense kriteria, maibé kuandu 20 mill militante ne’e, domina poder politika ona.

“Agora lei atu rejista partidu ne’e, persija 20 mill militante, maibé balu hatete dehan anti konstitusional, no balu troka kulit. Maibé problema ba ha’u mak ida ne’e, problema ne’e sei aumenta korupsaun politika,”relata Carrascalão ba jornalista sira iha Hotel Timor, Sesta (25/7).

Nia dehan, problema ida ne’e, poder ekonomika sei bele domina poder politika ona, ema osan barak nia bele hari’i partidu tuir nia hakarak.

Carrascalão mós dehan, tenke haree mós, CNE ho STAE ne’e saida. Tanba Carrascalão dehan, tuir nia hatene, STAE ne’e Governu nian, no CNE ne’e hanesan boneka ida.

“STAE ne’e mak haree partidu ne’ebé ke iha poder, tanba STAE ne’e husi Governu ninian. Husi CNE ne’e, lolos ne’e ida deit ho STAE atu bele hatu’un despezas, diminui mós posibilidade atu ema halo manipulasaun,”afirma Carrascalão.

Nia dehan, agora dadauk ne’e kuandu ema halo manipulasaun, sira hein atu lori deit ba Tribunal Distrital sira ne’e atu halo saida, lolos ne’e tenke kria Tribunal elojia ida espesial ba eleisoens.

Nia hatutan, tenke iha tribunal ida espesial ba partidu politika sira, atu partidu ida ne’ebé manan eleisaun, nia lakumpri nia promesa sira ne’ebé nia promete ba povu iha kampaña karik, tribunal ne’e tenke kastigu Prezidente partidu ne’e.

“Ita gosta kritika Indonesia, maibé Indonesia mós iha buat barak ne’ebé diak, no buat barak ne’ebé ladiak, maibé sira iha direktorat sosial politika,”tenik Carrascalão.

Nia hatutan, sira ne’ebé halo rejistu ba partidu foun sira ne’e, tenke husu partidu sira ne’e nia idolojia saida, atu hatene partidu ne’e atu ba los ka karuk. Maibé Carrascalão kontinua kestiona katak, ema sira ne’ebé halo rejista ba partidu foun ne’e mós, lahatene idologia partidu sira ne’e, ida ne’e mak problema.

“Hanesan bainhira kuandu ha’u forma ha’u nia partidu PSD, sira tenke hatete katak, la’e iha tiha ona partidu ASDT, se o hakarak tama partidu, o tama ba ASDT, tanba partidu rua ne’e hanesan deit. maibé tanba sira lahatete hanesan ne’e, entaun ha’u mós hari’i ha’u nia partidu PSD,”afirma Carrascalão.

Nia fó ezemplu, hanesan partidu FRETILIN uluk ema akuza dehan, marksista no komunista, maibé agora ne’e idolojia saida, tanba povu kuandu ba hili ne’e, haree tuir partidu ne’e nia programa.

Carrascalão dehan, povu tenke hatene katak, partidu politika ne’e, la’os klubu football, tanba ne’e, CNE ho STAE tenke hatene didiak, ema sira ne’ebé atu hari’i partidu ne’e, nia idologia no programa ne’e, saida, kuandu laiha idologia no programa, sira iha direitu atu kansela ema ne’ebé atu hari’i partidu, no partidu nia idologia la klaru mós, labele autoriza atu hari’i partidu.cos

Jornal Nacional