FALINTIL Instituisaun Ejisti Kleur No Tuan Iha Timor

Dili, Radio Online - Seremonia hasae bandeira ba aniversariu loron FALINTIL ba dala 40 halao iha Tasi Tolu, Dili, iha loron Quinta feira 20/08/2015, hahu ho parade military pronto F-FDTL.

Iha seremonia aniversariu ne’e mos halao seremonia promosaun, kondekorasaun no pasajen reforma ba F-FDTL sira ne’ebe ativu, iha mos intrega simbolikamente kilat husi veteranu ba jerasaun foun, intrega mos plaka komemorativa ba fundador FALINTIL sira.
Iha deskursu Presidenti da Republika hateten katak, “tinan 40, ne’e akontesementu importante tebes ba seitor hotu hotu”.

Presidenti da Republika konsidera katak, “instituisaun FALINTIL nudar instituisaun ida ne’ebe ejisti kleur no tuan liu iha Timor”.

Presidenti da Republika husu, “atu persija hametin liutan unidade, persija haforsa liutan konfiansa povu nian ba instituisaun sivil no militares sira, principal ba F-FDTL nian mak dejenvolve an no aumenta kompetensia  profesionalismu para kumpri mandatu ne’ebe konstituisaun fo hodi garante indepensia, integridade territorial, no liberdade e seguransa populasaun sira nian”.

Iha komemorasaun ne’e mos iha marsa husi veteranu desmobilijadu sira no iha mos aktividade desportu.

Rádio Liberdade Dili - Maria Bibel