Treinamentu Jornalizmu Online importante ba Jornalista Timor-Leste iha Era Konverjensia

Dili, Radio online - Diretór Ezekutivu Timor-Leste Media Development Centre (TLMDC), Francisco “Gari” da Silva hateten TLMDC sei realiza treinamentu kona-ba jornalizmu online ba jornalista sira iha loron Sesta (21/8) to’o Domingu (23/8) iha Ótel Vilaverde, Dili.

Treinamentu ne’e ho objetivu atu fó kuinesimentu kona-ba mudansa jornalizmu hosi mídia tradisionál ba mídia “konvergensia” iha era dijitalizasaun nian. Tuir nia, treinamentu jornalizmu online ne’e importante tebes ba jornalista Timor oan sira atu hetan no eleva sira ninia abilidade hakerek nia iha area jornalizmu, liliu oinsa hakerak notisia online no edita notisia iha website kada kanál mídia nian. “Treinamentu jornalizmu online ne’e importantante tebes ba maluk jornalista Timor oan sira atu bele hasa’e sira abilidade iha area jornalizmu. Liliu, jornalizmu online tamba agora dadauk ne’e iha kompetisaun maka’as entre mída tradisionál no mídia online.

 “Ema hahú dehan katak mídia online sai ona ameasa ba mídia imprimi [cetak] sira tamba notisia sira ne’ebé mídia online sira hato’o ne’e lalais no atuál tebes. Bele dehan ida-ne’e mak bisnis detik,” nia haktuir. Eis pesoál Internews ne’e mós haktuir katak teknolojia iha area konverjensia mídia [convergence] sei muda ema ninia hahalok no mós muda prosesu redasaun iha kada mídia. Tan-ne’e, nia hatutan jornalista ka mídia sira iha Timor-Leste sei hasoru dezafiu no difikuldade bainhira latuir evolusaun teknolojia foun mundu agora. Treinamentu jornalizmu online ne’e sei fó hosi treinadór profesionál jornalizmu online nian hosi Indonesia, Nezar Patria. Sr. Nezar nu’udar membru ativu Konsellu Imprensa [Dewan Pers] Indonesia nian no Vise Xefe Redasaun CNN Indonesia [dijital].

Antes ne’e Nezar mós serbisu nu’udar editór ba revista [majalah] famozu TEMPO iha Jakarta no sai Xefe ba Aliansi Jurnalis Independen (AJI) hosi 2008 to’o 2011. TLMDC nu’udar NGO nasionál ne’ebé harii iha Abril 22 2005, kontribui ona ba prosesu dezenvolvimentu mídia iha Timor-Leste husi-kedas Internews husik hela nasaun foun ne’e liu-hosi formasaun iha area jornalizmu no area sira seluk ba jornalista Timor oan sira.

Rádio Liberdade Dili - Francisco Gari