Joven 4 Autór ba Akontesementu Domingu Kalan iha Laga

Komandante Polísia Eskuadra Laga, Duarte Ximenes Belo hatete katak iha Segunda (17/08/2015) dader, veteranu Andre Belo “L4” mai hasoru ona nia iha edifísiu Polísia Eskuadra Laga kona-ba akontesementu iha Domingu kalan. Nia haktuir, L4 rekoñese katak joven balun ne’ebé akompaña mate isin eis Gerileiru Mauk Moruk maka halo provokasoens.

“Sira na’in haat (4) ne’e ida maka ita nia aman Cornélio Gama “L7” nia oan rasik. Tanba ida ne’e maka ha’u konfirma ona ba Komandu Polísia Munisípiu Baucau. Depois de hakoi eis Komandante Mauk Moruk nia isin mate, ami sei bolu sira na’in haat ne’e para bele submete ba prosesu investigasaun,” Duarte dehan ba Jornál Matadalan via telefone, Segunda (17/08) tuku 22:00 Otl.

Nia klarifika katak Task Force, Polísia Tránzitu no Polísia Militár halo passarevista iha Suku Mulia (área Laga) la’os atu impende família matebian viajen ba Baucau Vila ka Díli maibé halo identifikasaun ba autór balun ne’ebé maka iha Domingu (16/08) kalan estraga kareta Komandante  Polísia Eskuadra Laga, edifísiu Polísia Eskuadra no kareta Polísia Militár nian rua.

“Dehan katak proibi ema sira ne’ebé akompaña mate isin labele ba Díli ne’e ha’u senti la’os hanesan ne’e,” Komandante Polísia Laga haktuir hodi responde informasaun ne’ebé sírkula iha públiku katak Polísia no Polísia Militár impede família matebian Mauk Moruk labele ba Díli tanba relasiona ho akontesementu iha Domingu kalan.

Duarte afirma katak passarevista ne’e retira ona tanba identifika ona autór sira ne’ebé maka halo problema iha Domingu kalan. Tuir nia katak autór hirak ne’e sei submete ba kazu krime tanba estraga sasán estadu ka instalasaun estadu.

Komandante Polísia Eskuadra haklaken katak situasaun iha Postu Administrativu Laga, Munisípiu Baucau, iha Segunda ne’e la’o kontroladu hela. Nia aviza ba joven sira atu túr hakmatek tanba bainhira halo problema polísia sei atua tuir lei no órden. (Ekipa Matadalan)

Matadalan