Kareta PM no Edifísiu Polísia Rahun iha Laga, L7 Rejeita

Kareta Polísia Militár (PM) nian rua inklui kareta Komandante Polísia Eskuadra Laga hetan tuda iha Postu Administrativu Laga Vila, Munisíspiu Baucau, Domingu (16/08/2015) tuku 19:15 Otl. Kareta tolu ne’e hetan tuda bainhira akompaña mate isin eis gerileiru Mauk Moruk ho nia membru na’in tolu. Maske nune’e, la rezulta ema ruma kanek.

Tuir informasaun ne’ebé fó sai hosi Komandante Polísia Eskuadra Laga, Duarte Belo Ximenes ba Jornál Matadalan via telefone iha Domingu kalan tuku 21:00 katak sira deskonfia asaun tuda ne’e mai hosi joven balun ne’ebé akompaña eis gerileiru ne’e nia mate isin.

“Iha Suku Tequinomata, ema balun ne’ebé akompaña mate isin ne’e sai provokatór ba situasaun ida ne’e depois hakilar no sira tuda uluk ha’u. Ha’u senti ladun kontenti tanba ha’u bolu nia (oknum) dala hira maibé nia la interese no sira halai ba mai tuda ha’u,” nia haktuir.

Nia informa katak nia la hetan kanek maibé sira tuda kareta ninia odamatan no espellu liman loos nian rahun hotu. Tanba ida ne’e, nia konsege salva án hodi lori kareta halai tama iha Polísia Eskuadra laran. Iha biban ne’e, Duarte informa katak tuda mós kareta PM nian rua rahun hotu.

“Polísia Militár ne’e ohin akompaña mate isin hosi Díli. Teki-teki to’o iha Laga, hetan akontese ida hanesan ne’e,” nia dehan.

Nia hatutan katak nia simu órden hosi komandu, tan ne’e polísia tantu forsa miliár destaka fila fali mai iha Polísia Eskuadra Laga no iha Baucau Vila hodi akompaña situasaun. Maibé, Belo hatete, oras ne’e, situasaun la’o di’ak hela.

“Ha’u simu órden hosi ha’u nia komandu hodi retira seguransa hosi mate uma para labele hamosu fali problema seluk,” nia tenik.

Belo esklarese, iha akontesementu ne’e mós konsege harahun janela no odamatan Polísia Eskuadra Laga. Komandante Polísia Laga informa katak sira labele responde asaun ne’e tanba iha hela situasaun ida ne’ebé lori eis komandante FALINTIL ninia isin mate.

“Tanba saida maka ha’u nia primu João bele halo hanesan ne’e. Kuandu nia la satisfeitu ho situasaun ne’ebé maka iha (komandante Mauk nia mate), ita tenki tuir lei ka prosesu. Ha’u konsidera katak nia (João) sai provokatór. Nia maka organiza ninia maluk sira ne’e la’o ain hosi Tequinomata mai to’o iha Laga Vila hodi rezulta akontesementu ne’e,” Duarte haklaken.

Nia sei hato’o relatóriu ba Komandante Polísia Nasionál Timor-Leste hodi haree ba provokatór situasaun iha Laga.

Kona-ba Polísia Militár, Komandante Duarte informa katak Komandu Jerál F-FDTL fó ona órden ba membru Polísia Militár ne’ebé akompaña mate isin atu destaka hikas fali ba iha Baucau Vila.

Entretantu, Eis Komandante Gerileiru, Cornélio Gama “L7” ba Jornál Matadalan via telefone iha tuku 19:50 Otl rejeita joven sira ne’ebé akompaña mate isin tuda polísia no polísia militár. Nia dehan katak laiha akontesementu tuda polísia no polísia militár iha Laga inklui estraga Polísia Eskuadra Laga nia edifísiu.

“Buat ida rumoris ne’e maka atu estraga situasaun. Buat ida la akontese iha Laga. Purtantu, ne’e lia bosok ida,” L7 informa.

Tuir informasaun ne’ebé Matadalan simu hosi fonte kredível iha Laga katak Postu Administrasaun Laga mós hetan tuda hosi ema balun. Bainhira konfirma assuntu ne’e ba Administradór Postu Administrativu Laga, Francisco C. Belo, Domingu kalan, nia hatán katak momentu problema ne’e akontese nia iha ona ninia uma. Tanba ne’e, nia la hatene saida-saida maka rahun. Oras ne’e, nia ho nia família evuka tiha ona ba fatin seguru.

Entretantu, Komandante Polísia Eskuadra Laga hatán, nia simu informasaun katak edifísiu Postu Administrasaun Laga ne’e rahun duni maibé nia rasik seidauk haree ho matan.

Hosi Tutugua, fatin ne’ebé mate isin hatoba ba ka rezidénsia komandante L7, fonte kredível ida ba Matadalan haktuir katak  ema balun mós tuda fatuk dala tolu ba uma ne’ebé mate isin hatoba ba. Nia dehan katak ema deskoñesidu ne’e halai lakon ona no sira buka tuir mós la hetan sira nia paradeiru.

Mate isin komandante Mauk Moruk to’o iha Tutugua iha tuku 19:47 Otl. Tuir loloos to’o sedu maibé demora tuir dalan tanba família no kompatriota sira kari aifunan ba mate isin no fó sira nia orasaun ka minutu ida silénsiu.

Relasiona ho akontesementu iha Laga, Komandante Polísia Munisípiu Baucau, Superintendenti Justino Meneses bainhira Matadalan konfirma via telefone iha Domingu kalan tuku 19:30 Otl, maibé nia lakohi fó komentáriu no taka ninia telefone emidiatamente. (Ekipa Matadalan)

Matadalan