KAZU TRABALHADOR NA’IN 2 MATE IHA KOREA DO SUL REZOLVIDU

Kazu trabalhadores Timoroan na’in rua, (Marcelino da Costa Mendes (Aileu) no Alcino de Jesus (Same), ne’ebé mate iha Korea do Sul agora dadauk rezolvidu tiha ona, tamba hetan ona asuransi orsamentu $ 3 mil husi Governu Korea do Sul liu husi kompañia ne’ebé mak matebian sira servisu ba.

“Ami kontaktu ona ho familia trabalhadores matebian na’in rua ne’e hodi mai foti invoice iha SEPFOPE hodi ba foti osan iha banku (BNU) ho montante asuránsia ba kada matebian ida hetan orsamentu $ 3 mil”, hateten Xefi Departamentu Empregu Rai Liur iha Sekretariu Estadu Formasaun Profesional no Emprego (SEPFOPE) Valéncio Anes de Jesus, ba JN-Diário iha edifísiu SEPFOPE, eis UNDP Caicoli Dili, Kinta (17/9).

Nia dehan, kompañia hala’o pagamentu ba asuransi matebian nain rua ne’e ho montante $ 3 mil dala ida de’it, maibe sei iha prosesu adidu balun mak sei husu no sei la’o, tamba sei selu tan orsamentu balun tuir lei trabalho nian iha Korea do Sul.

Trabalhadores matebian nain rua ne’e ba servisu iha Korea do Sul iha fulan Agusto tinan 2014 ne’ebe foin halo fulan ida kompletu mak hetan dezastre iha servisu fatin,no matebian nain rua   ne’e   ho naran kompletu Alcino de Jesus husi munisipiu Same, no ida seluk Marcelino da Costa Mendes husi munisipiu Aileu.

Nune’e mos trabalhadores matebian nain rua ne’e mate iha Korea ,tamba hetan dezastre iha fatin servisu wanhira tempu hala’o servisu ,tamba area peskas ne’ebe mak matebian nain rua servisu ba ne’e servisu ida ne’ebe mak todan oituan.Tamba ne’e matebian nain rua ne’e dadauk ne’e halo tinan ida ho fulan sorin ona.

Xefi Departamentu Empregu Rai Liur iha SEPFOPE, Valencio Anes de Jesus, esplika katak, area ne’ebe mak trabalhadores Timor oan sira ba servisu iha Korea do Sul mak hanesan peskas,fabrika,no agrikultura.Departamento Emprego Rai Liur ne’e hatutan,area hirak   ne’ebe mak estabele iha kompanhia fatin ida ne’ebe mak sai prioridade liu ba feto Timor oan sira mak hanesan area fabrika,no agrikultura, tamba area rua ne’e mak servisu kaman ba trabalhadores feto sira.

Oras ne’e dadauk   total trabalhadores ne’ebe mka servisu iha Korea do Sul hamutuk 1,592 ne’ebe kompostu husi feto no mane   la konta ho nain 375 mak fila tiha ona mai Timor Leste, tamba ninia kontratu servisu hotu ona.tos

Jornal Nacional