ALEIXO COBRA SAI PILATUS BA FFTL NIA KAZU

DILI - Relasiona ho kazu ne’e, Vise Prezidenti Federasaun Futeból Timor-Leste (FFTL) asuntu relasaun internasionál informa tan, rejimentu interna FFTL bandu atu lori jogadór naturalizasaun nian mai joga iha Timor-Leste (TL). Entretantu, Inspesaun Jerál  Estadu hahú loke investigasaun ba Diresaun Nasionál Rejistu Notariadu.

”Ita tuir regulamentu ne’e buka jogadór ne’ebé mak nia iha ligasaun ran, Timor-oan mak bele mai joga iha ita nia nasaun, la’ós  bolu fali jogadór naturalizasaun”, Aleixo Cobra hatete ba diariu ne’e iha ninia servisu fatin, Kinta, (22/10).

Nia dehan, durante ne’e laiha koñesementu kona-ba jogadór naturalizasaun. “Ha’u mak tenki hatene uluk, maibé ne’e laiha. Derepenti sira mai dehan jogadór sira ne’e Timor-oan, entaun la-buat ida, sira Timor-oan bele joga de’it”, katak tan.

Emprezáriu ne’e realsa, la’ós obrigatóriu  ba FFTL buka jogadór hosi rai seluk mai defende TL, sira ne’ebé nu’udar  membru ezekutivu nunka hatene kona-ba asuntu jogadór naturalizasaun tanba laiha desizaun koletivu.

”Ha’u servisu iha federasaun tinan 10 ona, ha’u la-defende ema ida, ha’u defende federasaun. Kuandu sé mak sala nia tenki ba hatan, la’ós  halo sala, ema seluk mak atu ba hatan ne’e la-loos”, nia afirma.

Nia hatutan tan, ”ha’u servisu kle’ur ona iha ne’eba, ha’u hatene buat barak mak la-la’o, tanba ne’e ema ne’ebé mak halo sala, di’ak liu nia sai duke estraga fali federasaun, tanba nasaun ne’e harii ho ruin no ran”.

Tanba ne’e nia husu para halo investigasaun profundu ba jogadór naturalizasaun sira ne’e para bele hatene sé mak halo buat sira ne’e bele mosu, nune’e bele lori ba hatan iha justisa, tanba ema hotu tenki hakruk ba lei ne’ebé mak vigora iha nasaun ida ne’e.

Aleixo Cobra dehan, rekomendasaun Sekretariú Jerál  FFTL, jogadór naturalizasaun ne’e maske moris iha Brazil, maibé abo, inan no aman Timor-oan.

”Loloos ha’u mak ba trata ema sira ne’e mai, ha’u iha kompetensia ba trata sira ne’e, la’ós  sekretariu jerál  nia kompetensia, ne’ebé ha’u hatene katak naturalizasaun ne’e laiha, sé iha naturalizasaun duni, ema sira ne’e orijinál Brazileiru duni, hatan ba tribunál, sulan kadeia”, afirma tan.

Katak tan, ”jogadór ne’e maun sira hili tia mai mak hatete katak jogadór mak ne’e ona, oke joga ba, mas ha’u hatete naran Timor-oan, lohi to’o padre hotu, e justisa mak bele identifika sé mak loos, sé mak sala”.

Aleixo dehan, kazu sira ne’e hanesan parte exekutivu ne’ebé kompetensia ba asuntu estranjeiru la’ós  fase lima ba problema sira ne’e, mas durante ne’e exekutivu sira seluk laiha koñesementu ba jogadór naturalizasaun e hatene de’it mak jogadór sira ne’e Timor-oan.

Aleixo mos informa, tuir nia hatene labarik jogadór na’in  hitu ne’ebé lori hosi Brazil mai hamutuk ho ekipa selesaun nasionál hodi defende ba nasaun ida ne’e, balu hatete katak sira ne’e ema Brazil la’ós  sidadaun Timor.

”Agora labarik sira ne’ebé Brazil sira lori mai, nia hatete dehan ha’u ema Brazil, lohi sa”, tenik tan.

Nia reafirma, segredu barak mak arkivu ona iha tribunál. Tanba ne’e, nia husu ba Sekjer FFTL atu hatudu Prezidente FFTL para assume responsabilidade ba informasaun ne’ebé sai polemika iha públiku nia le’et.

”Ha’u nonok demais ona, agora mak tenki ko’alia para públiku tenki hatene, federasaun ha’u defende to’o mate, ema nauk-ten ha’u la-defende, ema mafiozu ha’u la-defende”, afirma tan.

Realsa tan, “ha’u sei hatete ba Amandio para hatudu Francisco, Francisco nunka kastigu, sulan nia ba kadeia, agora ha’u konfronta nia sa, ha’u hakarak haree nia to’o ne’ebé”, Aleixo deklara.

Emprezariu Timor-oan ne’e realsa, FFTL ne’e harii ho ruin no ran, ema hotu nia terus, la’ós  tanba ema ida rua nia kosar ben de’it.(way/flo/oki)

Timor Post