TINAN LIMA, POPULASAUN TL AUMENTA 100 MIL RESIN

Jornal Nacional - editorial

Ministeriu Finansas, Dirasaun Statistika Kuarta feira liu ba fo sai resultadu preleminariu sensu uma kain 2015 . Dadus nebe halibur durante sensus nee hatudu katak total populasaun Timor Leste ema nain 1.167,242.

Sensu 2015, nudar sensu ba dala tolu ona, sensu ba dalauluk halao iha tinan 2004 ho total populasaun 923.198 no iha 2010 nebe total populasaun 1.066. 582. Husi numeru nee hatudu katak kada tinan lima – lima populasaun Timor Leste aumenta ema nain rihun atus ida resin (100 mil)

Maske nunee resultadu sensus 2015 nian nee iha reduzasaun tamba husi tinan 2004 ba 2010 iha aumenta ema nain 143.283 maibe husi tinan 2010 ba 2015 populasaun aumenta ema nain 100.660.

Ho numeru populasaun nebe iha nee kada tinan iha bebe 20.000 mak moris, tan nee governu liu husi Ministeriu Saude tenki halo esforsu makaas iha programa planemantu familiar atu oinsa bele minimiza taxa natalidade nian.

Sensus populasaun nee governu halo kada tinan lima- lima ho objetivu atu halibur dadus konaba total populasaun, nivel ekonomia, nivel edukasaun, saude no mos atu hatene total populasaun desempregu atu nunee governu bele trasa planu tuir ba dadus nebe halibur husi sensus.

Dadus sira nee sai nudar base ba estadu, li-liu governu atu oinsa traza planu desenvolvimentu ba tinan lima nian. Tan nee iha sensus sempre ejiji atu kada sidadaun fo informasaun nebe lolos, la bele fo informasaun falsu.

Resultadu sensu 2015 nian nee iha numeru populasaun tun kompara ho sensu tinan lima liu ba. Nee signifika katak sidadaun komesa konsiente ona planemanetu familiar nian tamba antigamente rata – rata kada kabenain iha oan nain 7 maibe ho situasaun ekonomia mundu ohin loron nian, rata – rata kada kabenain ida iha oan nain 4.

“Agradese tebes ba populasaun tomak nebe mak laran luak partisipa iha sensus 2015 tamba populasaun la partisipa karik, sensus nee la lao”, “dokumentu resultadu sensus nee iha ba ita ida idak ninia servisu lor-loron nian” PM Rui Maria de Araújo, JN-Diario edisaun 22 de Outubro 2015.

Los duni senhor, presiza duni povu ida nee merese agradesementu, sensus nee susesu tampa partisipasaun populasaun nian, liu husi fornesementu informasaun nebe kada sidadaun infrente lor-loron nian.

Agora kestaun mak dadus nee populasaun fornese ona maibe oinsa governu halo planu nee bele koresponde duni ba nesesidade nebe povu infrenta nee ka lae? tamba kada sensus povu aprezente sira nia kondisaun moris, kondisaun ekonomia maibe planu nebe governu trasa la koresponde ba nesesidade nebe povu iha.*