Estratejia Treinadór Sala

Matadalan - Editorial

Adeptus timoroan laran dodok tebes. Basá, selesaun nasionál Timor-Leste ba Pra-kualifikasaun Kopa Mundiál 2018  lakon 1-0 ho selesaun nasionál Malázia iha Estádiu Munisipál Díli, 13 Outubru 2015. Entretantu, impata 1-1 ho selesaun nasionál Palestina iha loron 08 Outubru 2015.

Tuir loloos, ekipa Timor-Leste manán hela. Manán tanba joga iha nia rain rasik no manán adeptus. Sai kestaun ba ekipa Timor-Leste maka kolokasaun jogadores la tuir iklima. Ita hatene katak Timor ne’e rai manas. Tan ne’e, divia timoroan sira maka joga tanba sira toman ona ho iklima.

Agora, sé ita monta fali jogadór naturalizasaun, automatikamente sira la toman iklima manas. Sira toman iklima malirin tanba sira nia rai malirin. Jogadór hirak ne’e mai hosi Portugal no Brazil.

Joga ho nasaun rua ne’e, Timor-Leste bele sukat ninia án katak nia bele manán jogu rua ne’e. Maibé, problema maka jogadór sira nia rezisténsia la aguenta ba kondisaun iklima refere. Ita hotu haree ho matan katak kuandu tama iha jogu segunda parte, jogadór sira nia rezisténsia komesa menus. Tanba ne’e, sira labele infrenta bola long no sistema ofensiva hosi adversáriu.

Iha ne’e, ita bele dehan katak treinadór uza estratejia sala. Treinadór mós laiha vontade hodi troka jogadór sira. Realidade hatudu katak médiu defensivu selesaun TL ne’e pásivu liu maibé kontinua mantein to’o jogu ramata.

Foin lalais joga ho Palestina ne’e sei iha oportunidade ba treinadór atu troka jogadór rua (2) para tau médiu defensivu para bele asegura tiha (1-0) ne’e maibé saida maka akontese, tau fali avansadu ida. Tan ne’e, kuandu tau avansadu só ita unggul ou lakon. Maibé tau fali avansadu, ikus mai ema halo impata.

Ba oin, kuandu TL sai uma na’in ba kualker jogu, presiza análiza ba iklima. Jogu ne’e polítika ida. Sé polítika ida, ita labele konfia de’it ita nia téknika ka tátika jogu maibé konfia mós iklima. Monta jogadór sira ne’ebé toman iklima para bele manán jogu. Abrasu. (*)