GOVERNU ALOKA US$ 36000 BA PREMIU PREZEPIU NATAL

DILI - Governu sei gasta osan hamutuk US$ 36000 resin ba prezépiu  Natal sira hosi  munisípiu  12 eseptu rejiaun autonomu Oe-Cusse.

Vise Ministru Administrasaun Interna, Tomas do Rosario Cabral hatete, baze legal ne’ebé  atu fo prezente ba prezépiu  Natal sira iha Munisípiu  12 ne’e mai hosi  despaisu Gabinete Primeiru – Ministru (GPM) nian ho numeru 1884/GPM/XII/2015, loron 11 Dezembru 2015.

Cabral mos husu ba administrador Munisípiu  sira atu habelar informasaun ne’e ba to’o iha Suku sira iha territóriu  tomak.

“GPM sei fo premiu ba tinan foun mai iha loron 31 Dezembru 2015. Sei fo premiu ba prezépiu  sira ne’ebé  di’ak liu iha territóriu  nasional,” hatete Tomas do Rosario Cabral liuhosi  konferensia imprensa iha nia serbisu fatin, Dili, Segunda (14/12).

Cabral esplika, primeiru lugar ba munisípiu  Dili ne’e sei hetan osan US$ 1500, segundu lugar sei hetan US$ 1000 no terseiru lugar sei hetan US$ 500.00. Signifika, primeiru lugar ne’e sei iha 12 hosi  Munisípiu  12 nian. Entre munisípiu  12 ne’e sei hili ida de’it hodi sai vensedor nasional ida. Vensedor nasional ne’e sei hetan osan hamutuk US$ 2500.

Kompozisaun grupu ba juri ne’e sei mai hosi  Estatal nian. No atividade halo prezépiu  Natal nian ne’e, Cabral husu ba Administrador Munisípiu  sira tenke halo to’o iha nivel suku sira iha territóriu  tomak. Premiu atu fo ba manan nain sira sei realiza iha loron 31 Dezembru kalan iha Palasiu Governu nian oin, Dili.(oki/jxy)

Timor Post