Ministru indonéziu kordenadór ba Asuntu Polítiku, Lei no Seguransa vizita Timor-Leste

Ministru Kordenadór ba Asuntu Polítiku, Justisa no Seguransa hosi Indonézia, Luhut Pandjaitan, hahú ohin vizita ida ho oras 12 nia laran iha Timor-Leste hodi prepara vizita hosi xefe Estadu indonéziu, Joko Widodo, iha fulan ne'e nia laran, iha Timor-Leste.

Luhut Pandjaitan sei hasoru malu ho responsável timoroan oioin, haktuir hosi programa atualizadu hosi vizita ne'ebé fó sai ohin hosi Ministériu Negósiu Estranjeiru (MNE) timoroan nian.

Tuir fonte hosi MNE timoroan, iha previzaun katak Joko Widodo bele vizita Timor-Leste iha semana ikus fulan-Janeiru nian, loron loloos sira sei defini iha enkontru sira ne'ebé Luhut Pandjaitan sei halo iha Díli.

Pandjaitan lidera delegasaun ida ho ema na'in 25 resin ne'ebé inklui ministru Interiór, Tjahjo Kumolo, responsável sira seluk hosi departamentu governamentál sira Indonézia nian no responsável militár sira no mós hosi forsa sira seguransa nian.

Iha loron-tersa dadeer, sei halo enkontru sira ho primeiru-ministru timoroan, Rui Maria de Araújo, no hafoin ne'e sei hasoru malu ho membru oioin hosi ezekutivu Timor-Leste nian, antes halo deklarasaun sira ba imprensa.

Sei hasoru malu ho xefe Estadu Taur Matan Ruak no hosi ministru ba Planeamentu no Investimentu Estratéjiku Xanana Gusmão.

Vizita iha Timor-Leste sei hakotu ho vizita ba semitériu indonéziu Seroja, iha bairu Santa Cruz, no ba sentru kulturál indonéziu foun, ne'ebé harii iha tempu badak tebes iha fulan neen ikus ne'e.

SAPO TL ho Lusa