Vítima sira iha Istanbul barak liu maka ema alemaun

Métodu no objetivu hatudu katak hanesan atentadu ida hosi Estadu Islámiku, maibé autoria hosi esplozaun, ne'ebé oho ona, pelumenus, ema na'in 10, seidauk reivindikadu.

Vítima sira hosi atentadu ne'ebé akontese iha loron-tersa dadeer iha sentru turístiku Istanbul nian barak liu ema alemaun. Tuir fonte ofisiál turku sira, iha pelumenus ema alemaun na'in sia entre vítima sira ne'ebé mate.

Tuir ajénsia Reuters, bombista suisidu ida halo ona ema na'in 10 mate no na'in 15 kanek, hafoin halo nakfera nia aan iha zona ida ne'ebé turista sira baibain frekuenta.

Primeiru-ministru, Ahmet Davutoglu, kontakta ona xanxeler Angela Merkel hodi hatudu kondolénsia ba vítima alemaun sira no halo ona reuniaun emerjénsia ida krizi nian hosi governu iha Ankara. Bolu ona responsável prinsipál sira ba seguransa iha nasaun ne'e, hanesan ministru hosi Administrasaun Interna, Efkan Ala no xefe hosi serbisu sekretu sira, Hakan Fidan, no membru sira seluk hosi Ezekutivu.

Prezidente turku, Tayyip Erdogan, hatete ona ba públiku katak identifika ona bombista hanesan sidadaun síriu ida no maski atentadu ne'e seidauk reivindika maibé suspeitu prinsipál sira monu ba auto-proklamadu Estadu Islámiku.

Hosi investigasaun dahuluk sira, mane ho bomba ne'e karik tama iha nasaun liuhosi Síria no la referensiadu hanesan estremista ida.

Prasa Sultanahmet hanesan pontu turístiku ida ne'ebé ema vizita liu iha Istanbul no situa iha besik Meskita Azul no Bazílika Santa Sofia, ne'ebé koñesidu hanesan Hagia Sophia.

Iha grupu seluk ne'ebé halo atentadu sira iha Turkia, hanesan estrema-eskerda ka independentista kurdu sira, maibé fiar katak atentadu ne'e halo hosi jihadista sira tanba akontese iha zona turístiku ida.

Nasaun ne'e iha alerta hahú hosi fulan-Outubru, bainhira bombista suisidu na'in rua halo ona ema na'in 103 mate iha Ankara, hafoin halo nakfera sira nia aan besik iha protestu pasífiku ida.

SAPO TL ho Renascença – Foto: EPA@ STR Turkey Out