Ezonerasaun ba Lere, Taur Defende Estadu Tranzisaun

Kazu ezonerasaun ne’ebé Prezidente Repúblika (PR) Taur Matan Ruak halo ba Xefi Estadu Maior das Forsas Armadas, Jenerál Lere Anan Timur, iha Kinta (25/02/2016), Xefi Estadu Taur Matan Ruak tún direta ba Parlamentu Nasionál (PN) hodi presta ninia mensajen du estadu ba públiku no populasaun tomak.

 Taur dehan, nia simu proposta ida (1) hosi Governu, no iha proposta ne’e Governu husu atu mantein nafatin pozisaun Jenerál Lere nian, maibé nia la konkorda tanba nia rasik defende estadu ida tranzisaun.

“Asuntu Jenerál Lere nian ne’e ha’u sempre defende estadu ida tranzisaun hosi estadu de homem ba estadu de lei. Uluk iha ai laran mate maka troka, iha vila laran tenke troka kuandu ita moris,” dehan PR iha ninia deskursu iha PN.

Nia dehan, tranzisaun tenke halo tanba importante hodi fó oportunidade ba ema seluk atu aplika ninia sabedoria, teste ninia kapasidade, no útil ba nasaun ou lae. Nia afirma katak nia rasik halo ida ne’e iha tinan 2011 ne’ebé nia rasik tinan ki’ik liu koroneis hotu-hotu iha forsa armadas nia laran.

“Sé ha’u la sai, ne’e hanesan kareta iha tráfiku boot. Pior liu sira seluk sai uluk hosi ha’u, tranzisaun la la’o. No ha’u sai la’os ha’u baruk no hakarak sai Prezidente de’it, maibé liu-liu sai para fó fatin ba sira seluk,” Taur afirma.

Eis Maijor Jenerál ne’e haktuir tan katak, laiha momentu ida ne’ebé nia rasik hateten ba koroneis sira katak sira tenke hela to’o baruk de’it, no laiha momentu ida mós maka Prezidente hateten ba Primeiru Ministru ida katak Maijór Jenerál Lere tenke hela.

“Laiha momentu ida ke ha’u konversa ho jenerál Lere hodi ha’u hatete ba nia katak, nia tenke hela. Ha’u sempre hateten, sé fó fatin ba sira seluk di’ak liu-tan ita boot sai ho naran moos, elojiadu,” Taur haktuir.

Nia mós hakarak jura bainhira iha toma pose para atu halo lei, aplika lei no konstituisaun. No ita nia komandante sira tuir lei, sira nia tempu hotu liu. Nia rasik lahatene, nia maka sala ou Governu maka sala tanba Governu aprezenta proposta ba Prezidente Repúblika atu hili Xefi Estadu Maior das Forsas Armada foun no proposta Governu nian rua (2). Entre proposta rua ne’e, iha ida maka rekondusaun. Ne’eduni, nia la konkorda ho rekondusaun tanba implikasoens ba koroneis sira ne’ebé tuir mai la iha promosaun.

Jenerál Filomeno Paixão rasik mós laiha promosaun tanba nia kontinua nafatin iha nia pozisaun, no karik sira na’in rua (2) nafatin só altera lei tanba sé la altera lei sira na’in rua (2) sei sai dala ida. Sai dala ida maka tenke lori koronel rua (2) maka promove ba brigadeiru ida no ida seluk ba maijór jenerál. Xefi Estadu Maior Falur Rate Laek mós tenke hotu ninia mandatu tanba mandatu rua (2) de’it, depois de dois anus. Oportunidade promosaun ba sira seluk laiha.

Taur husu, seráke kazu ida ne’e maka sai preukupasaun boot? Tanba iha asuntu balun ne’ebé boot liu ida ne’e maibé ita konsege ultrapasa. No ezonerasaun Jenerál Lere nian sai tiha polémika boot. “Ha’u nia haree ida ne’e la’os problema. Problema ba ha’u forma oinsá ita lori Timor no tipu de sivilizasaun ne’ebé ita harii iha Timor,” nia dehan. (Jon)

Matadalan