Problema Barak Mosu Iha Verifiasaun Dadus Veteranus Husi 2003

DILI - Rejistu dadus veteranus husi 2003 too agora, iha prosesu verifikasaun seidauk hotu, depois rejistu 2009 mos seidauk book, tamba iha dadus sira nee mosu problema barak.

Ho razaun sira nee husi governu liu husi Ministeiru Solidaridade Sosial (MSS) inklui komisaun Homenazen sei realiza konfrensia nasional veteranus, hahu husi loron 1 too 3 Marsu 2016, hodi rezolve problema nee.

Ba kestaun nee Vice Ministru MSS Miguel Manetelu katak relasiona ho konferensia nasional veteranus nee, komisariu sira husi komisaun homenazen mos reprezentante husi organizasaun veteranus halo ona deslokasaun ba munisipiu sira, hodi halo enkontru ho kuadru rezistensia sira hotu hodi hili sira nia reprezentante, partisipa iha konferensia nee.

Iha Konfrensia nee asuntu importante tolu maka sei koalia iha konfrensia nee, ida maka hare prosesu rejistu ba 2003, tamba ita hatene katak prosesu rejistu 2003 ninia prosesu verifikasaun ate agora seidauk remata, tamba sei iha problema barak, depos sigundu rejistu husi 2009 nia seidauk book, tamba razaun prosesu verifikasaun husi 2003 nia seidauk hotu,” hateten Manetelu, liu husi konferensia imprensia, iha salaun MSS, Caicoli, Dili, Kuarta (23/02/2016).

Iha konferensia nee mos koalia no rona opiniaun husi kuadru rezistensia sira konaba dekretu lei, neebe atu estabelese Konsellu Veteranus, ema hotu hatene katak prosesu nee lao, tamba hetan veta husi Prezidente Republika, neduni Komisaun ho Ministeiru hanoin katak presiza atu loke konsulta ba entidade hotu, liu-liu kuadru rezistensia sira husi frente 3 hanesan frente armada, frente klandestina ho frente diplomatiku.

Iha fatin hanesan Komisariu Politika Orgaun numeru 8, Norberto Esprito Santo hateten dadus veteranus husi 2003 mosu problema, tamba deskonfia iha veteranus falsu barak.

Observasaun jornalista nota katak iha konferensia Prezidente Komisaun Homenazen la partisipa, tamba membru Komite 12 Novembru halo asaun protesta, tamba halo kontestasaun ba vitima 12, maibe iha konferensia nee partisipa deit husi Koadrus Superior Luta Libertasaun da Patria Koronel Falur Rate Laek, Komisariu Politiku Veteranus, Vice MSS Miguel Manetelu. Informasaun kompletu iha STL jornal no STL Web, edisaun Kinta (25/2/2016). Joao Anibal

Suara Timor Lorosae