HAK: Governo Japaun Seidauk husu deskulpa formál ba vitima Jugun Lanfu sira

Radio Liiberdade Online- Atu hanoin hikas fali istória okupasaun militár Japaun Iha Timor durante tinan rua ho balu (20 Febreiru 1942 – Agusto 1945), liu-husi Konfensia Imprensa iha salaun Yayasan HAK (19/2/16), Sisto dos Santos Nudar Koordenador Programa iha Yayasan HAK afirma katak Governo Japaun Seidauk husu deskulpa formál ba vitima sira.

Ida-ne’e seidauk bele kura vitima Jugun Lanfu nia dignidade, dehan Sisto iha konferensia imprensa ne’e. “Governu Japaun seidauk fó deskulpa formál, ne’e seidauk kura avo sira nia dignidade no Familia sira nia dignidade ,” Sisto nu’udar mós ativista Front Estudante Timor-Leste haktuir. Iha fatin hanesan, Porta Voz Yayasan HAK, Marina Galucho hateten katak “Jugun Lanfu maka feto no labarik feto sira ne’ebé hetan forsadu sai “atan seksuál” ba Tropa Japonés iha kolonia molok no durante segundu Guerra Mundiál. Iha estimasaun variadade ba feto sira ne’ebé sai vitima ho numeru entre 20.000 to’o 360.000 husi fonte Xina (numeru serteza sei halao peskiza no diskute.” “Iha rai barak hanesan Korea, Filipina, Burma, Tailandia, Vietnam, Malaysia, Taiwan, Indonezia no Timor-Leste rasik.

Iha mos numeru balu hatudu katak feto balun Belanda no Australia mós saiJjugun ianfu. “ Porta voz ne’e esklarese liu-tan katak Faktu krime kontra úmanidade duarante tempu okupasaun militár Japaun Iha Timor durante tinan rua ho balu ne’e konsege rezulta vitima Feto foinsae sira hamutuk 15 mak sai vitima ba asaun imorál no brutalizmu Tropa Japonés. “Ema Timor oan hamutuk 600.000 liu mak obrigatóriamente servisu hodi fo hahan ba militar Japonés durante tinan rua resin.

Governo Japaun husu ona “Deskulpa Formal” ba Vitima sira iha Korea do Soul no fo ona kompensasaun ba vitima sira. Tamba sa mak Timor nian imi haluha? “ Marina kestióna. Liu husi konfensia imprensa ne’e HAK huau ba Governu Japonés atu hatudu fuan boot hodi hakonu obrigasaun ba feto vitima sira iha rai seluk nune’e mos iha Timor-Leste. “Ami mós husu Komunidade Internasionál atu kontinua ezize ba Governo Japaun atu hakonu nia obrigasaun hodi dignifika vitima sira no halo prosesu julgamentu formál ba autór sira ne’ebé komete krime kontra úmanidade,” voz ne’e husu`` Iha okoziaun ne’e mós HAK husu ba Governu Timor-Leste atu halo diplomasia mutuál ho Governo Japaun hodi buka solusaun ba kazu ne’e tamba durante ne’e vitima no familia vitima sira ne’ebé dadaun ne’e hela iha situasaun mizeravel nia laran.

“Durante ne’e Governu Timor-Leste no Japaun harii ona relasaun bilateral no kooperasaun iha area oioin. Rezultadu husi relasaun ne’e, Povu Japaun mós oferese ninia fundu hodi ajuda prosesu dezenvolvimentu nasaun fou ne’e iha area agrikultura, infrustrukrura, edukasaun no area seluk-tan. Maibé tuir organizasaun sosiadade sivil sira, ajudu ne’ebé Governu no Povu Japaun fó ne’e nu’udar obrigasaun móral no ida-ne’e tenke halo tamba tropa Japan husik hela naha psikolojia boot ida ba povu Timor-Leste durante no hafoin ninia okupasaun militár iha 1942 – 1945. Sosiadade sivil iha nasaun ne’e mós halo ona esforsu barak hodi ezize Governu Japaun atu formalmente husu deskulpa no fó kompensasaun ba vitima sira, maibé to’o agora seidauk realiza.

Rádio Liberdade Dili