Timor La’os Austrália Nia Kolonia

Sobu tiha lei ne’e. Sunu tiha lei ne’e. Lei la serve no ba Timor lei ne’e la funsiona. Timor la’os nasaun dependente ida. Austrália hetan apoiu hosi nasaun boboot sira tanba ne’e hakarak halo konforme nia hakarak, Timor la’os nia kolonia.

Problema fronteira marítima entre TL ho Austrália ladauk hotu. Austrália kaer metin akordu ne’ebé uluk iha tempu okupasaun indonézia halo ho Austrália hakat ba oin hodi tau ses tiha Timor nia direitu soberania fronteira marítima tuir lei internasionál.

Maibé ohin loron Timor hanesan nasaun soberania ona, Vigáriu Jerál Episkopál Re-Evanjelizasaun Dioseze Díli,  Padre Juvito do Rego Araújo dehan Timor-Leste iha ona direitu soberania fronteira marítima tanba ne’e luta to’o mate ba direitu ida refere.

“Sé Austrália iha direitu ba limite marítima ida entaun Timor mós iha direitu ba ida ne’e. Ne’ebe, direitu ida ne’e maka fó ba ita. Timor la’os atu ba hadau Austrália nia rai ida. Timor ezije nia direitu de’it. Direitu ida ne’e Timor tenke iha. Tanbasá maka Austrália lakohi fó? Tanba matan fuan naklosu ba mina ne’e,” Padre Juvito hato’o kestaun ne’e iha nia serbisu fatin, Bidau Lecidere, Segunda (15/02/2016).

Pe. Juvito dehan fronteira marítima ne’e direitu internasionál ne’ebé Timor tenke hetan, maibé tanbasá maka Timor labele rezolve problema ida ho Austrália.  Nia esplika sé Timor lebele hetan nia direitu fronteira marítima, di’ak liu sobu tiha lei internasionál marítima ninian tanba lei ne’e rasik la funsiona ba TL.

“Sobu tiha lei ne’e. Sunu tiha lei ne’e. Lei la serve no ba Timor lei ne’e la funsiona. Timor la’os nasaun dependente ida. Austrália hetan apoiu hosi nasaun boboot sira tanba ne’e hakarak halo konforme nia hakarak, Timor la’os nia kolonia,” Amu Juvito salienta.

Vigáriu Re-Evanjelizasaun ne’e dehan tuir loloos lei internasionál iha tiha ona, ita kumpri de’it no lalika deskuti tan ona maibé tanba de’it Austrália nia polítika ulun moruk maka Timor ba keisa to’o iha Tribunál Internasionál ne’ebá maka foin hakfodak atu rezolve.

Amu Juvito hatutan katak Timor luta ba nia ukun rasik-án durante tinan 24, to’o mate mohu maibé nunka hakiduk to’o hetan independénsia, no ohin loron mós Timor sei mantein pozisaun hodi luta ba nia direitu to’o hetan.

Austrália ulun toos atu rezolve problema fonteira marítima ho TL tanba sira bazeia de’it ba akordu ne’ebé Indonézia halo ho Austrália. Pe Juvito dehan “Indonézia nia okupasaun iha TL ilegál, ne’ebe akordu hotu-hotu halo ne’e ilegál tanba la tuir lei. Austrália bazeia ba ne’e entaun Austrália mós ilegál hotu,” nia kestiona.

Rezolve fronteira marítima sei fó impaktu ba relasaun TL ho Austrália? “Ah. Sé maka tauk relasaun ladi’ak ho Austrália. Relasaun ho Austrália hodi uluk kedas ladi’ak to’o agora. Ami la presiza Austrália ida. Viziñu ida sabraut hanesan ne’e ita la gosta ida,” Amu Juvito akresenta.

Nia salienta polítika boa vizilánsia ne’e tenke la’o, la’os Austrália hanesan nasaun boot tanba ne’e Timor tenke tuir de’it ne’e labele. Amu Juvito ho lian maka’as hatete “ha’u hanesan sidadaun Timor luta to’o mate ba Timor nia Direitu”.

Xanana Gusmão reprezenta TL ba negosiasaun fronteira marítima. Nia dehan ne’e kompeténsia Konsellu du Minístrus maka deside katak Xanana Gusmão iha kompeténsia boot atu hala’o serbisu ne’e, maibé ita viola ona lei tanba kompeténsia ne’e tuir loloos ita intrega ba Ministériu Negósiu Estranjeiru no Kooperasaun (MNEK) no instituisaun sira seluk maka ba halo negosiasaun.

Xanana iha relasaun di’ak ho Austrália? “Bele fó impaktu ladi’ak, maibé ita bele dehan amigu bele amigu maibé negósiu parte ketak ida,” Pe. Juvito dehan.

Peskizadór Ekonomia ONG Lao Hamutuk Juvenal Diaz hateten saída maka Timor-Leste ezije agora ne’e atu husu nia direitu soberania. Austrália tenke deside liña fronteira marítima bazeia ba prinsípiu no lei internasionál.

“Timor ezije nia direitu soberania. Austrália nia kerakusan, egoizmu, hakarak atu buka manán de’it atu bele benefisia sira (Austrália),” Juvenal hato’o kestaun ne’e ba Matadalan iha MNEK, Segunda (15/02/2016).

United Nations Convention on the Law of the Sea (UNCLOS) iha prinsípiu rua atu rezolve fronteira marítima maka Mandatóriu no negosiasaun bilaterál. Juvenal dehan Austrália la sai hosi UNCLOS maibé sira hili dalan negosiasaun bilaterál atu rezolve problema fronteira marítima ho TL.

Kona-ba Xanana Gusmão maka lidera TL ba negosiasaun ne’e, Juvenal dehan nia konkorda tanba Xanana kompriende saída maka TL nia interese. Nia haforsa katak ita tenke luta maka’as duni ba TL nia direitu soberania fronteira marítima.

Ho konfiansa tomak ne’ebé TL intrega ba Xanana Gusmão atu lidera prosesu negosiasaun ho Austrália, nia sujere katak TL tenke ezije uluk maka fronteira marítima tanba ne’e kestaun soberania.

Xanana iha relasaun íntimu ho Austrália karik sei fó impaktu ladi’ak ba TL? “Ha’u la fiar Xanana Gusmão halo hanesan ne’e, tanba Xanana Gusmão gasta nia tempu tinan 24 iha ailaran atu defende TL nia interese. Nia ema ida matenek no iha integridade atu halo ida ne’e,” Juvenal dehan.

Vise Minístru Negósiu Estrajeiuru no Kooperasaun, Roberto Soares hateten, konserteza tanba desizaun estadu no Governu nian hodi fó konfiansa totál ba eis Primeiru Ministru ne’e.

“Ha’u hanoin ne’e kauza ida ne’ebé importante teb-tebes tanba ligasaun ho ita nia soberania nasionál no teritoriál integriedade,” dehan Vise Minístru iha edifísiu MNEK, Praia dos Coqueiros Díli foin la-lais ne’e hafoin ramata reuniaun ho embaixadores balun.

Nia mós fiar metin katak, povu tomak no lideransa hotu depózita konfiansa totál ba atual Minístru Planeiamentu Investimentu Estratéjika ne’e atu nune’e bele asegura soberania nasionál. Nia dehan, orientasoens konkretas kona-ba hanoin no hamosu estratéjia, pozisaun no mós téknika iha negosiasaun ne’e iha tempu badak Xefi Negosiadór ne’e sei fó sai ba Ministériu Negósius Estrajeirus atu nune’e bele hatutan ba embaixadores ida-idak hodi mantein no artikula linguajen ne’ebé hanesan.

Tuir nia, presiza duni tau hamutuk ita nia forsa, hanoin, determinasaun no konviksaun hanesan uluk hamutuk luta ba ukun rasik án. Tan ne’e, ohin loron presiza tau nafatin ita nia espíritu nasionalizmu, patriotizmu hamutuk atu nune’e bele asegura ita nia soberania nasionál. “Ha’u hanoin ita labele hakiduk, hodi monu ba manobras no tentasoens ne’ebé karik mosu, maibé hamutuk para bele asegura ita nia soberania nasionál,” nia hatutan.

Deputadu hosi Bankada FRETILIN, Eládio Faculto, sente orgullu ho nomeiasaun Xanana nian tanba nia nu’udar líder máximu ba luta libertasaun nian. No kontinua ezerse ninia funsaun ne’ebé boot atu halo negosiasaun ba fronteira marítima nian.

“Ha’u fó ha’u nia apoiu totalmente ba líder Kay-Rala Xanana Gusmão tanba nia ema ida ne’ebé kualidade di’ak tebes atu halo negosiasaun iha futuru. Ne’eduni, ita iha esperansa boot hodi hetan rezultadu di’ak ho ita nia maun boot ne’e ninia papél ne’ebé sei uza durante negosiasaun,” dehan Eládio iha Parlamentu Nasionál, Segunda (15/02).

Kona-ba vontade Austrália nian ba negosiasaun ne’e, nia dehan katak, ita haree uluk ita nia vontade antes haree ba vontade Austrália nian. Maibé, tuir nia katak Austrália mós hakarak hetan pozisaun di’ak, ne’eduni sira mós halo esforsu tomak.

Ba liña marítima ne’e, Faculto informa,  iha definisaun bainhira haree ba regras no lei internasionál nian ne’ebé koloka limitasoens ba fronteira marítima ne’e la’os Austrália ninia hakarak atu dudu Timor-Leste tuir de’it ninia hakarak. Maibé, tuir nórmas internasionais katak iha liña marítma ne’e tenke define tuir nórmas internasionais nian.

Nia afirma, ho negosiasaun ne’e atu halo aprosimasaun hodi haree Austrália no Indonézia atu bele rekoñesse soberania país Timor nian, liu-hosi liña marítima. Tanba labele haree nasaun ne’e ki’ik atu tuir de’it, ne’e laiha.

Austrália rasik sees án ona hosi United Nations Convention on the Law of the Sea (UNCLOS), ka lei tratadu tasi nian. Deputadu ne’e hateten, Austrália abandona hosi UNCLOS tanba tenta dezvia hodi hatudu ninia superpoténsia iha sudeste Aziátiku. Tanba ne’e nia (Austrália) abandona. Ne’e signifika katak nia hakarak kontribui ba ilegalidade ne’ebé maka iha, ou iha jogu foer.

Nia dehan, Austrália sei lakon simpatia hosi nasaun barak bainhira nia hakarak lori povu Timor ba iha konsekuénsia ruma, no nasaun barak sei solidariza ba Timor hodi dudu Austrália ba iha negosiasaun ida ne’ebé tuir nórmas internasionais ninian.

Ho kondisoens ne’ebé Timor-Leste infrenta, nu’udar nasaun foun, Eladio hateten, tuir loloos Austrália maka tenta posibilidade atu ajuda hodi hamri’ik ho ninia apoiu, la’os atu esplora fali Timor ne’ebé kondisoens sei fraku.

 “Tuir loloos nia maka ajuda para ko’alia ho Indonézia para bele fó direitu soberania ba fronteira Timor nian ne’ebé kompleta. Nia rasik tenke sai hanesan promotor tanba nia hanesan nasaun potensiál iha Ázia,” deputadu ne’e dehan. (Efrem/Jon)

Matadalan