LIXU SAI PROBLEMA BO’OT BA TL

Problema bo’ot ba Timor Leste (TL) ne’ebé oras ne’e dadaun akontese mak, lixu nakonu iha sidade laran.

Xefi Estadu ne’e hatutan, ko’alia kona-ba lixu ne’e, uluk nia sei Jeneral Governu haruka nia atu organiza forsa ho PNTL atu hamos Dili laran.

“Maibé ha’u dehan ba sira katak, bele maibé, sei hamos para oin sai iha televizaun, ha’u lakohi. Maibé Governu dehan, la’e ida ne’e tenke hamos semana ida dala ida. Ne’ebé ha’u hanoin, lixu husi primeiru Governu to’o agora sai problema bo’ot, ida ne’e ha’u hanoin sosializasaun mak seida’uk to’o,” dehan PR Taur Matan Ruak liu husi dialogu komunitária ho povu Suku Fatubesi, Postu Administrativu Hatolia, Munisípiu Ermera Kinta (18/02).

Xefi Estadu ne’e haktuir, foer ne’e iha impaktu bo’ot hodi inunda sidade laran, no inunda tasi.

“Tanba ne’e tenke bandu importasaun plástiku tama mai Timor Leste,” katak Taur Matan Ruak.

Nia esklarese, ai horis sira ne’e labele tesi arbiru, tanba ai horis ne’e halo parte ba vida moris ema nian, tanba nia mak fó mahon ba ema moris. Tanba ne’e Taur Matan Ruak husu ba povu atu labele naran tesi ai arbiru, tenke hadomi ambiente.

Xefi Estadu ne’e husu atu povu mak uza mudansa mundu, labele moris tuir fali mudansa nia hakarak.

Taur Matan Ruak afirma lia hirak ne’e hodi responde kona-ba preokupasaun komunidade Feriano N. Carvalho nian ne’ebé hatete katak, Xefi Estadu ne’e fó ona honra ba Suku barak katak, Estadu halo ona buat barak, maibé barak mak seida’uk halo. cos

Jornal Nacional