TINAN IDA VI GOVERNU…!!!

Jornal Nacional, editorial

VI governu Konstitusional, lideradu Rui Maria de Araujo, dia 16 Fevereiro, horseik kompleta tinan ida governasaun. Komprimisu Primeiru Ministru, Rui Maria de Araújo iha serimona simu bensaun husi Presidente Republika iha tempo neba mak atu kombate kultura birokrasia iha Administrasaun Publiku nia laran no reforma fiskal.

“Ami nia prioridade maka, kombate turtura birokratizasaun iha administrasaun publika, ne’ebé sai todan nafatin hanesan elefante ida ho ain halo ho taho. Sestu governu sei hakas an atu hafilak elefante ain tahu ne’e, sai birokrasia ida kaman no professional liu, tekniku liu no ladun politizadu. Tanba ne’e hau sei ejiji husi governu no ejiji ba hau nia an rasik, kona-ba rigor no integridade maka sei sai nu’udar fatuk sikun ba ezekutivu ida ne’e, hodi hetan boa governasaun, transparensia hodi konbate korupsaun” diskursu PM Rui Araujo hafoin simu posse iha dia 16/02/2015 iha Palacio Nobre Lahane.

Hanesan Primeiru Ministru foun, jersaun foun nebe ho espiritu makaas atu hadia birokrasia iha funsionalizmu publiku tan nee, Xefi governu nee hahu kedas visita ba instituisaun sira, Komisaun Funsaun Publika, visita Portu Dili, Alfandega, Dirasaun Nasional Transporte Terreste no visita dirasaun Impostu nebe iha Ministeriu Finansas.

Agora duvidas mak tinan ida ona mandatu VI governu nee saida mak governu nee atinji ona? iha duni mudansa birokrasia administrasaun publiku ka birokrasia nee kontinua akontese? Reforma fiskal nee akontese duni ka sei iha deit ibun tutun? Tinan ida ona nee tempo atu avalia kinerja servisu governu nee nian.

Promesa ida seidauk kumpri, mosu tan promesa seluk, nebe hatete katak ho aniversaio ba tinan ida nee ba oin sei servisu makaas liu tan hodi servi ba intrese Estadu ida ne’e nian.

VI governu nee labele halo mudansa birokrasia, labele halo reformasaun fiskal tamba governu nee se kompara samea karik, ikun labaku tuir ulun. Ministru no Sekretario Estadu partido seluk, direktores jeral partido seluk, pior liu tan funsionariu iha fali oposisaun ba diretores no membru governu sira, laiha sinkronizasaun servisu, tamba ida idak ho ninia intrese partidaria.

Governu nee atu fo kontenti ba malu, Partido Politiku sira nebe asentu iha Parlamentu ka hetan votus iha eleisaun 2012 liu ba tamba partido hat nebe povu fo fiar, CNRT, FRETILIN, PD no FRENTE – MUDANÇA, hamutuk iha parlamentu no mos iha governu, laiha ida mak kontrola ida seluk.

Partido sira nee hotu iha ninia ema iha governu, Minsitru no Sekretario Estadu tan nee ego partidaria, no mos ida idak hakarak buka sai heroi atu hatudu ba povu katak sira nia partido nee halo duni buat ruma ba povu nudar eleitores.

Aniversaio ba tinan ida VI Governu Konstituional nee, Primeiru Ministru rasik laiha korazen atu fo sai susesu saida mak governu nee iha durante tinan ida nia laran. Governu laiha susesu tamba fatores sira mensio iha leten.

Ne’ebe atu fiar ka la fiar, simu ka la simu katak governu nee sei la atinji buat ruma too mandatu remata, tamba governu nee ninia mandatu la too tan tinan ida tamba tama 2017 eleisaun, dadauk membru governu sei uza tempo barak liu ba konsolidasaun partido duke servisu estadu atu atende nesesidade povu ninian. *

Jornal Nacional