PR Taur Sei Dialogu Ho Veteranus F-FDTL

DILI - Relasiona ho polemika nomeasaun Jeneral F-FDTL foun, veteranus sira neebe ativu iha F-FDTL hatoo karta petisaun ba Prezidente Republika Taur Matan Ruak, e kontiunidade ba prosesu nee Prezidente sei halo dialogu ho veteranus sira neebe ativu iha F-FDTL hodi buka solusaun.

Lia hirak nee hatoo husi Primeiru Ministru (PM) Rui Maria de Araujo, ba Jornalista sira, hafoin remata enkontru ho Prezidente Republika Taur Matan Ruak, iha Palasiu Prezidensial, Aitarak Laran, Dili, Kinta (28/04/2016).

Konaba nomeasaun Jeneral F-FDTL nian, hanesan ema hotu hatene katak veteranus sira neebe ativu iha F-FDTL nia laran, hatoo deklarasaun ida ba Prezidente Republika e kontiunidade ba prosesu ida nee Prezidente informa ona ba governu katak Prezidente sei organiza dialogu ida ho veteranus sira neebe ativu iha FFDTL nia laran, iha dia 6 maiu agora, atu buka solusaun ba problema nee,” hateten PM Rui.

Xefi Governu nee mos hatutan atu koalia konaba veteranus sira neebe ativu iha F-FDTL nia laran, konaba sira nia deklarasaun no buat sira neebe sira hateten iha surat nee nia laran, hodi nunee Prezidente foti medidas tuir deklarsaun nee.

Antes nee Xefi Estadu Maior Jerenal FFDTL Maijor Jeneral Lere Anan Timur hanesan mos veteranus ativu iha FFDTL hateten, sira hatoo ona karta ba Prezidente Republika, maibe ninia kontiudu sira la kohi fo sai, sira hein resposta husi Prezidente foun sira fo sai nia kontiudu nee.

Iha parte seluk Ministru Defeza Cirilo Cristovao hateten veteranus sira neebe ativu iha FFDTL hatoo sira nia karta petisaun ba Prezidente Republika Taur Matan Ruak, nee sira nia direitu. Informasaun kompletu iha STL Jornal no STL Web, edisaun Sesta (29/4/2016). Joao Anibal

Suara Timor Lorosae