Laboratorium
Nasional (LabNas) iha kapasidade atu halo teste ba aihan importasaun sira,
maibe tuir Diretor Jeral (DJ) Ospital Nasional Guido Valadares (HNGV), Jose
Antonio, katak presiza iha baze lega ida.
Tuir
nia, presiza duni halo teste ba aihan importasaun sira hanesan aifuan,
latarias, na’an lata no bebida sira, tanba iha aihan balun kontamina ona ho
kimiku ne’ebe bele estraga ema nia saude.
“Laboratorium
nasional iha kapasidade halo teste ba aihan importasaun sira, maibe labele halo
teste lai, tanba laiha politika ida atu fo dalan ba sira tun ba merkadu hodi
teste aihan sira ne’e,” DJ HNGV dotor Zeto hateten, iha Dili.
Nia
hateten, Ministerio Komersio Industria e Ambiente (MKIA) tenke servisu hamutuk
ho Ministerio Saude atu bele iha politika ou diploma ida hodi fo autorizasaun
ba iha ekipa laboratorium tun ba baze halo teste.
Durante
ne’e, nia hateten, laboratorium nasional halo deit teste ba ema sira ne’ebe
deskonfia hemu veneno, klarifika lolos hahan ne’ebe sira konsumu kontamina ho
veneno ga la’e.
Entretantu
Diretora Ezekutivu organizasaun Hamutuk Ita Ajuda Malu (HIAM) Health, Rosaria
Martins da Cruz, preokupa ho situasuan ida ne’e tanba ohin loron tipu aihan
barak tama mai rai laran hakerek ho lingua ne’ebe povu la komprende.
Tanba
ne’e, nia husu, ba Timor oan sira atu kuda aihan lokal sira hodi konsumu,
minimiza konsumu aihan importasaun sira (latarias), tanba la garantia ba ema
nia saude diak ga la’e.
“Hahan
ne’ebe agrikultor sira produs sei la estraga Timor oan nia saude, tanba
produsaun sira ne’e organiku hotu laiha unsur kimiku ida ne’ebe oho Timor oan,”
nia hateten.
Nia
dehan, ohin loron Timor oan barak mak mate ho idade ne’ebe ki’ik, tanba sofre
moras kroniku oi-oin ne’ebe kauza husi aihan sira ne’ebe la saudavel.
The
Dili Weekly
Sem comentários:
Enviar um comentário