AGOSTINHO: LIA FUAN MILISIA NE’E HANESAN KONSEKUENSIA • ADRIANO: AGOSTINHO LA’OS MAU-HU NO TRAIDOR

Hakraik an, badinas, koalia mamar,  sempre hamansa no fo oin midar, la arrogante ho honestidade. Ida ne’e maka karater ne’ebe forte tebes iha postura  Agostinho Gomes, atual Direktor kompanhia TINOLINA no Vise Prezidenti Consorçio Naçional Timorense (CNT).

Agostinho Gomes, bele dehan, laos figura foun iha mundu emprezarial no laos mos ema foun  ba povu  Timor Leste, espesial liu ba povu Same-Manufahi. Iha tempu Indonesia, nia sai hanesan Xefe Obras Publiku (Kepala Dinas Pekerjaan Umum) no Timor ukun aan nia sai hanesan emprezariu ida neebe susesu tebes iha ninia kareira professional.

Agostinho Gomes, oan primeiru husi maun-alin nain 12, nudar fini domin husi Alberto Gomes Marçal (matebian) ho Leonor Sereno (matebian). Nudar oan primeiru, Agostinho toma responsabilidade bot teb-tebes iha sira nia familia. Husi maun alin nain 12 nee, nain rua (2) mate iha ailaran no nia alin ida moris iha ailaran.

Agostinho Gomes, akompania prosesu independensia nee hahu husi tinan 1975 to’o Timor  hetan independensia. Iha tinan 1975,  hahu prosesu luta ba independensia ho funu hasoru inimigu Indonesia, Agostino ho nia familia tomak ho laran mos involve iha prosesu ida nee hodi  halai ba ailaran hamutuk ho Timor oan hotu funu hasoru inimigu.

“Iha ailaran, hau nia aman kaer kilat, hau kaer kilat ho hau nia alin ida naran Osvaldo Sereno Gomes “Berekiak” (tropas Indonesia oho iha ailaran iha fins de 1978) ne’ebe nia medalha de Merito hau rasik maka rai hela. Ami hamutuk ho komandante Laloran (Atual Xefe Suku Komoro, Eurico da Costa) funu hasoru inimigu. Ami kaer kilat durante tinan ida nia laran, ami tiru malu ho tropas Indonesia. Ami la hakiduk,” Agostinho Gomes, haktuir ba jornalista sira, Kuarta (01/06/2016), hodi halo esklaresimentu kona-ba nia passado no nia familia nia kontribuisaun ba prosesu luta libertasaun nasional.

Iha tinan 1976 nia klaran, situasaun apertadu tebes. Populasaun iha ailaran inklui Agostinho ho nia familia  hetan difikuldade kona ba alimentasaun (aihan).  Nune’e, hanesan maun boot, Agostinho ho nia aman matebian desidi entrega kilat ba sira nia komandante Laloran (Eurico da Costa) hodi tuun mai halo to’os iha sira nia fatin naran Saratan halo to’os hamutuk ho komunidade hodi sustenta malu no sustenta familia uma laran.

Alein de halo to’os, Agostinho nia aman hanesan ema ne’ebe servisu nanis iha hospital hodi aikulit Timor nian ajuda populasaun ho forsa FALINTIL sira neebe hetan kanek ka moras.

Agostinho rasik hamutuk ho grupu OPJT (Organizasaun Popular Juventude Timor) ho OPMT (Organizasaun Popular Muhler  Timor), inklui nia feton rasik  Maria Serreno Gomes “Binahak”, agora dau-daun nia restus mortais hamutuk ho nia kaben  Hamis Baserewan (Hatta),  sei iha hela Hospital Guido Valadares (HNGV), lori hein prosesu funeral, ne’ebe mos nia medalha de Merito iha hela Agostinho. Ami hamutuk halao aktividade alfabetizasaun ba povu sira.

“Ami hamutuk ho Danila Maria da Costa alias Bilora halao aktividade alfabetizasaun ba camaradas maubere no buibere sira nomos ami hanorin manual politiku FRETILIN nian ba sira. Eis Embaixador Indonesia nian, Arlindo Marcal mos hamutuk ho ami halao aktividade ida nee i mos ajuda populasaun sira halo evakuasaun ba fatin seluk bainhira iha informasaun katak, inimigo atu halo asaltu ba fatin nee,”  Agostinho haktuir.

Iha fulan Outubru 1978, Agostinho nomeado ba Komandante Kompanhia das Armas Brancas.  Iha loron 31 Dezembru 1978, Prezidente FRETILIN, Camarada Nicolau Lobato hetan tiru husi inimigu Indonesia.

“Ema hotu iha ailaran tristi tanba lakon ona ninia manu aman ida hanesan lider masimu iha ailaran. Ema hotu liu-liu sira neebe iha ailaran preokupa ho situasaun ida nee, tanba povu tomak iha ailaran konfuzu tanba nudar manu oan karik lakon tiha ona sira nia inan, ne’ebe la hatene los atu ba tan nabe no hanoin mos lakon hotu. Orientasaun ba komando da luta lakon totalmente,  entaun, ami deside atu entrega an. Depois entrega-an, tropas Indoensia sira komesa investiga hau no husu ba hau  kona ba hau nia rian Hamis Basarewa “Hatta” ho hau nia feton Maria Sereno Gomes “Bilunar”  to’o  utiliza fali hau atu tenke hatudu sai maluk FRETILIN sira ne’ebe sei subar. Maibe, hau rekuza no kumpri deit kastigu hotu ne’ebe tropas Indonesia halo ba hau,” katak  Agostinho.

Husi fulan Janeiro tinan 1979,  Agostinho sai TBO (Tenaga Bantuan Operasi ) ba  Primeiru Xefe Seksaun Militar nian neebe bai-bain ema  bolu Kasi satu (I).

“Komu hau  hatene uitoan bahasa Indonesia no hatudu komportamentu diak, bapa nee haruka hau atu kontinua eskola.  Maibe, momentu nee hau sei hanoin kuandu hau ba eskola, se mak atu hare hau nia familia sira neebe moris iha situasaun hamlaha no ekonomia fraku tebes. Hau desidi diak liu hau buka servisu. Hau hasoru hau nia tia Lucrecia dos Reis Fernandes,  neebe koñese diak Sr. Abilio Osorio Soares, eis Governador Timor-Timur, tanba eis Governador ne’e maka salva tia Lucrecia kuandu nia tian detida hela iha KOREM Dili. Hau nia tia lori hau ba Abilio Osorio no Abilio simu hau diak. Laos hau deit, Abilio halibur  hotu ema FRETILIN sira  neebe tun husi ailaran iha Obras Publikas. Maibe, Abilio simu konsekuensia husi bapa sira atu oho mate  nia tanba deit nia halibur ema Fretilin,” Agostinho fo sasin.

Altura nee, Agostinho hatene uitoan bahasa Indonesia ho Inglesh, maka nia ba tuir kursu Radio iha Jakarta to’o hetan diploma. Fila fali mai, Agostinho hetan kolokasaun ba monta radio iha Maliana hodi fo relatoriu andamento projetu sira iha Maliana mai Obras Publikas iha Dili. Nia  mos fo treinu ba Maliana oan ida naran Jose para atu opera radio nee.

Depois fulan nen, bainhira Jose hatene opera tiha radio ne’e, Agostinho  husik hela servisu nee ba  fali servisu seluk obras publika nian nudar mandor ba projetu.

Tanba nia servisu ho vontade no badinas hodi hatudu prestasaun diak,  maka nia hetan tan fiar husi obras publikas sai nudar pelaksana  iha projetu nee. Husi pelaksana sae ba pimpinan proyek ka pimpro i depois sae ba  Kepala Seksi, estrada ho ponte nian i ikus liu iha 1994 nia nomeadu ba xefi dos servisus das obras publikas (Kepala Dinas PU).

“Hau laos ema engeneiru ida, maibe tanba hau servisu badinas no hatudu prestasaun diak,  maka iha tinan 1994, obras publikas fo fiar ba hau sai hanesan Kepala Dinas Pekerjaan Umum iha Munisipiu Bobonaro.  Hahu husi nee, situasaun politika kona ba Timor nian komesa manas iha Jakarta, maka hau komesa involve iha diskusaun ho grupu kiik oan neebe xefi husi Manuel Magalães de Oliveira, aman husi Fidelis Magalães ho Nivio Magalães, nudar hau nia xefi ne’ebe hau troka. Ami  koalia kona ba  situasaun ema sira husu ezilo politiku tanba iha neba hau nia tiun nain 2, ida maka sr, Dr. Antonino Gonçalves ho ida seluk maka sr. Abilio de Oliveira Sereno,” dehan Agostino.

La’os atividades sira ne’e deit, iha 1992 bainhira akontese Masakre Santa Cruz,  tropas Indonesia oho jovens barak no barak mos halai lakon hotu ba foho. Altura neba, depois de akontesimentu 12 Novembru, alin mane ida naran Amano Bobo, agora membru PNTL konsege halai sai hosi mate laran ba Maliana. Iha neba ema kaer nia ba prizaun. Agostinho maka ba hasai nia husi kadeia para lori nia ba eskola no hela ho Agostinho.  Maibe, Amano nakar teb-tebes la tauk bapa, revolta hela deit hasoru bapa to’o nia husik hela eskola hodi halai ba ailaran no ikus mai ita hotu rona dehan katak, nia asalta polisia sira iha area Lolotoe nian hodi koa tiha polisia nia tilun.

Iha tinan 1989, Agostinho hetan problema hasoru  Bupati Guilherme dos Santos, ho nune’e, Bupati atu koloka fali nia hanesan Kepala Dinas Sosial.  La konkorda no la satisfeitu ho kolokasaun ne’e, Agostinho tuun mai Dili koalia ho sr. Eurico Lemos, Sekretariu ba Dinas Pekerjaan Umum Tk. I Timtim, hodi fo hatene ba kona-ba tranferensia ne’e. Tanba hetan prestasaun diak durante nia halo knar hanesan kepala dinas PU Bobonaro, hetan progresu diak maka Dinas Perkejaan Umum Tk. I Timtim, hanesan instansia ne’ebe boot liu deside hodi muda fali ba Kabupaten Tk.II Manufahi mos  hanesan kepala dinas PU embora nia rasik la’os engineiro.

Husi tinan 1997 to’o tinan 1999 mos Agostinho halo buat barak iha area obras publikas nian, liu-liu iha Same Vila kona-ba bee hemu ne’ebe sempre sai problema tinan ba tinan iha vila neba.

Antes  konsulta popular (Referendum), situasaun iha teritoriu tomak manas. Bapa sira  kria grupo milisia iha teritoriu tomak no mos ikus liu iha Manufahi. Nudar Kepala Dinas PU, Agostinho ho Bupati (Administrador) Manufahi, Nazario Tilaman de Andrade nomos liurai Letefoho nia oan ho naran Jaime da Costa ho seluk-seluk tan tuur hamutuk koalia kona ba situasaun ida nee.

Fou-foun Bupati Nazario Tilman, ulun to’os no lakohi kedas atu simu influensia tropa Indonesia nian atu harii grupo milisia ABLAI  iha Manufahi. Maibe, tanba presaun politika no iha mate nia laran, Bupati Nazario bolu Agostinho ho belun balun tan atu bele simu bapa nia presaun ne’e. Ho nune’e, tenke tama ba tropa Indonesia nia politika harii milisia iha Manufahi ho  naran ABLAI.

“Bupati Nazario bolu ami hodi tama ba ABLAI ho estratejia ida katak, infiltra iha grupu ABLAI laran no buka hatene segredu tropas Indonesia nian atu bele iha antisipasaun atu la bele mosu ran fakar ka masakre iha Manifahi,” Agostinho konfesa hikas tanba altura neba komesa ona masakre iha Dili, Liquica (Maubara) ho fatin seluk tan.

Nia lia tun tan dehan, “Ami nia Bupati Nazario José Tilman de Andrade  ho Sr. Jaime da Costa, nudar Liurai oan, sira nain rua iha karisma no influnsia bo’ot iha Manufahi altura ne’ebá. Hau nudar kepala dinas PU, hau nia kolega Apolinario da Silva Gusmão, nudar kepala kantor Bangdes no Domingos Savio, kepala Dinas PDNK Same, tama ABLAI tanba altura ne’eba hanesan pejabat no antes ne’e mos grupo milisia forma tiha ona iha teritoriu Timor laran tomak.”

Momentu neba, Agostinho ho nia colega sira hatene tiha ona konsekuensia futuru nian, katak loron ida ema sei bolu sira milisia ou mate karik bapa sira hatene sira halo sevisu kepala dua, atu la bele husik povu Manufahi mate no fakar ran.

“Karik ami la hadomi rai ne’e, ami buka diak deit, ami husik rai ne’e ami halai ona.”  Prosesu hahuu lao no konflitu fakar ran akontese iha fatin hotu-hotu, nune’e Bupati Nazario konvida nia kolega Jaime da Costa, Agostinho, Domingos ho Apolinario, hodi halo planu zere situasaun iha Same atu populasaun Same ida deit mos la bele fakar ran.

Ema Same hotu hatene, katak, iha maiyoria fatin iha teritoriu tomak fakar ran, maibe rai Manufahi la iha ran ida maka fakar. Ne’e tanba Bupati Nazario ho Jaime nia korajen no  brani lori jere situasaun nee.

“Iha rejultadu anunsia Konsulta Popular iha 4 Setembru 1999, ne’ebe hatudu maioria povu Timor hili ukun rasik an, loron ne’e kedas milisia asaltu ami, iha rezidensia Bupati Nazario nian hodi tiru rahun sasan hotu, inklui uma rahun hotu. Tanba momentu neba Bupati la iha uma i sai hela. Ha’u rasik hala’i monu tuun ba rai naruk Pouzada Same nian tanba milisia tiru hau to’o hau monu dodok hotu,” Agostinho konta tuir.

Nia lia tun tan, milisia hirus sira tanba milisia haree antes ne’e Bupati Nazario ba koalia no husu ajuda ba DANDIM hodi selu mos ho osan Rp. 40 Juta, atu la bele oho Same oan nain 119 ne’ebe tama lista metan militar nian atu oho momentu neba. Inkluzivamente sira nebe subar iha igreja Paroquia Same.

Hafoin konvense tiha DANDIM, Agostinho halao fali misaun ida ne’ebe orienta husi Bupati Nazario hodi lori osan Rp. 15 Juta selu KAPOLRES Same atu asegura seguransa iha Same laran no liu-liu kontrola milisia sira la bele sunu povu nia uma no la bele oho povu.

“Same oan sira barak maka sai sasin ba ami nia esforsu ne’e, ne’ebe nia rezultadu hatudu katak, mesmu masakre mosu iha fatin-ffatin, la iha ema ida maka mate. Talves, ema balun nia uma  maka ema sunu, mas ne’e fora de ami nia kapasidade,” Agostinho hateten.

Iha mais au menus, entre Marsu-Abril 1999, ami simu apelu ida husi estafeta komandante Falur Rate Laek nian e ami hotu, kompostu husi Bupati Nazario, hau rasik, ho sra. Maria PDI no seluk-seluk tan  fo kontribuisaun osan hodi haruka ba diresaun komando da luta nian liu husi estafeta ne’e.

Iha kalan ida, Bupati Nazario bolu Agostinho dehan, Adriano Corte-Real, eis Sekretariu Estadu iha Governu FRETILIN nudar mos FRETILIN nia lider ida iha Manufahi altura neba, iha hela perigu laran no presiza atu evakua lalais husi nia fatin tanba KAPOLRES maka informa ba Bupati Nazario katak, KOPASUS sira deteta ona subar fatin Adriano nian.

Kalan ne’e kedas, mais ou menus tuku 08:00, Agostinho telefone ba Apolinario tanba Adriano ne’e Apolinario nia rian hodi buka dalan halo nusa maka lori sai tiha Adriano husi fatin perigu ne’e. Nune’e, Apolinario to’o mai, Bupati Nazario dehan, imi haree ba lori sai kedas Adriano agora duni.

Agostinho halai ba foti nia kareta ne’ebe para hela iha Bupati nia uma lori mai tula Adriano hamutuk ho Apolinario lori sai Adriano evakua tiha ba iha Apolinario nia feton ida naran Natercia nia uma. Ikus mai, lori Adriano ba subar tiha iha igreja.  Agostinho ho nia colega sira kontua lori dosi, hahan no nesesidade balun ba haree FRETILIN nia oan lubuk ida ne’ebe subar iha Igreja laran.

Husi subar fatin igreja, persegidu sira ne’e mos husu ba Agostinho, Apolinario no Domingos Savio atu ajuda sosa no lori hela fos ho nesesidades alimentasaun nian ba familia sira iha ida-idak nia uma.

“Depois ONU fo sai avizu kona ba rezultadu Konsulta Popular iha 4 Setembru 1999, situasaun manas. Bupati Nazario konsege hetan ligasaun ho sira ailaran  para ami atu ba ailaran, maibe milisia sira hatene ona,  tan nee ami deside hilai ba Atambua. Atu sai deit ba Atambua mos bapa prende tiha hau, sorti Bupati Nazario maka fo fali osan  Rp. 2,500.000 liu husi hau nia alin ida naran Fernando Marques ba bapa Komandante KORAMIL para bele husik hau sai. Fo tiha osan ne’e, bapa ne’e duni maka akompanha hau tanba tauk milisia sira atu halo buat ruma ba hau karik i nia akompanha hau hodi ba husik hela iha ponte Aiasa dalan atu ba Hatudo hodi lori halai liu ba Atambua.

“Iha Atambua mos situasaun la siguru ba hau tanba KOPASUS halo persegisaun ba hau nafatin i falta oituan deit atu oho tiha ona hau, se karik hau la halai ba Kupang,” hateten Agostinho.

Ho situasaun persegidu ne’e, Agostinho halai ba Kupang. Mas iha Kupang mos hanesan, nia halai ba Surabaya, depois ba Jakarta. Iha Jakarta nia ba nia tian ida naran Agusta Emilia Fernandes ne’ebe hela iha Depok depois nia tian ne’e ho nia kaben lori Agostinho subar iha zona Kalibata, too Presidente Indonesia, Abdul Rahman Wahid (Gusdur) desolve KOPASUS husi sira nia operasaun nee.

Iha loron 15 tinan 2000, Agostinho fila fali mai Timor liu husi Cruz Vemelha (Palang Merah Internasional). Husi 2001 to’o agora Agostinho dedika nia knar lori servi povu no nasaun ida ne’e hanesan emprezariu. Hanesan buat ne’ebe publika ona iha media loron hirak liu ba.

“Se hau milisia no liman foer karik, hau la brani mai fali Timor, no desde hau mai to’o agora  seidauk iha ema ida, inklui Same oan rasik mos seidauk hatudu liman mai hau dehan, hau milisia, oportunista no mau-hu. Ida ne’e maka presizamente Cesar Moreira hatene atu koalia karik sukat no tenke ho evidensia,” afirma Agostinho.

Husi ne’e ba oin, Agostinho dezafia ema hotu, atu bele aprezenta evidensia konkreta kona-ba ninia pasadu no karik iha ema ka familia ruma maka sofre husi ninia hahalok politika iha 1999  bele aprezenta reklamasaun no lori ba Tribunal.

Agostinho la’os mau-hu

Veteranus no Komisariu Politika FRETILIN nian, Adriano Corte-Real alias Breok fo sasin ba publiku katak, nia koñese diak Agostino Gomes ho ninia familia, tanba uluk hahu prosesu independensia, sira hamutuk iha ailaran no funu hasoru inimigu Indonesia. Agostinho nia aman mos kaer kilat tiru malu ho inimigu Indonesia.

 “Se Sr. Agostinho ho ninia familia traidor, oportunista no mau-hu, ohin loron hau la moris hanesan nee, tanba iha momentu neba  hau tama lista metan ou target   bapa sira nian atu oho. Bapa sira sempre koalia katak  ita tenke hati-hati  ho breok,” Adriano fo sasin ba jornalista via telefone  Tersa (31/5/2016).

Tuir Adriano,  iha tinan 1999, bainhira situasaun politika manas, bapa sira kaer no sulan nia iha sela, hein deit tempu atu oho nia ho razaun nia ema neebe risku tebes ba bapa sira iha Same.

“Iha altura nee, hau nia moris la seguru, tanba lor-loron bapa sira buka hau bei-beik, mesmu hau subar  iha padre sira  nia misaun mos, sira buka nafatin tanba hau ema berbahaya  ba sira. Sorti, Maromak tulun hau liu husi  Agostinho no Administrador Manufahi, Nazario Tilman de  Andrade,  salva  hau husi bapa sira nia liman, se lae ohin loron hau la moris hanesan nee. Kuandu, Agostinho nee mau-hu, tidak mungkin  nia fohatene Administrador Nazario no nia rasik kalan boot lori kareta ba tula naok hau hodi salva hau husi bapa sira nia liman,” Adriano fo sasin.

Adriano Corte-Real mos hatete katak  Agostinho ho nia familia sira laran mos ba rai ida nee. “Sira (familia Agostinho-Red.) ema mesak isin no ran FRETILIN deit no sira nia familia barak  mak mate tanba defende rai ida nee atu hetan ukun an. Sira laos traidor, oportunista no mau-hu. Sira nia laran mos ba rai ida nee,” tenik Adriano.

Nia hatete ba Timor oan tomak katak, Timor hetan  independensia nee laos ema ida rua nia kontribuisaun deit, maibe Timor oan tomak nia sakrafisiu no kontribuisaun. “Ohin loron ita ukun an tinan 14 tiha ona. Ita lalika fila fali ba kotuk, hateke ba oin. Ohin loron, ita nia relasaun amizade ho Indonesia diak teb-tebes, ita halao ona rekonsiliasaun ho Indonesia nomos rekonsiliasaun entre Timor oan sira iha ita nia rai laran. Buat neebe akontese iha pasadu haluha ona, mai ita hotu hateke ba oin dezenvolve ita rain ba futuru diak liutan,” hatete Adriano Corte-Real. sel/mia

Jornal Nacional