LEOVIGILDO-HORTA LANSA TOUR DE TIMOR-DMI

Sekretariu Estadu Juventude no Desportu (SEJD), Leovigildo da Costa Hornai, ho Premiadu Nobel da Paz, José Ramos Horta, Segunda (06/06/2016), halo lansamentu ba eventu Tour de Timor no Dili Maratona Internasional (DMI) ne’ebé sei hala’o iha loron 13-17 fulan Setembru tinan ne’e (2016).

Objetivu husi eventu rua ne’ebé mensiona atu promove identidade kultural no area turismu Timor Leste ba mundu internasonal. Seremonia lansamentu Tour de Timor no Dili Maratona Internasional ne’e hala’o iha edifisiu SEJD, eis-sional Lecidere Dili.

Hafoin lansamentu remata, iha entrevista ba jornalista sira, José Ramos Horta, hateten, Tour de Timor no Dili Maratona Internasional ne’e, oinsa atu anima komunidade sira.

“Se ita kaer didiak nafatin ho ideias kreatividade, ne’e primeiru mak ita mobiliza ita nia populasaun bele ogulho no sei haree aktividades sira ne’e iha sira nia sukus, postu adminisitrativus no munisipius nomos tau Timor Leste iha mapa turissmu, tanba Guvernu koalia preokupasaun oinsa bele diversifikasaun ba ekonomia. Ita haree rai barak, hanesan Bali Indonesia, Fiji ne’ebé moris iha turismu, tanba rendimentu turismu iha Bali no Fiji ne’e boot liu buat hotu-hotu, ne’e duni Timor Leste koalia kona bá diversifikasaun ninian, ne’e ha’u hanoin númeru ida mak turismu, maibe tenke iha kondisaun dame no iha seguransa ne’ebé mak diak,”dehan Ramos Horta.

Fundador Tour de Timor ne’ebé sai núdar mos konseleiru ba eventu internasional rua (Tour de Timor-Dili ho Maratona Internasional), José Ramos Horta salienta, kona ba aspetu seguransa ho dame iha TL la’o diak.

“Ha’u haree seguransa Timor nian ne’ebé diak, nakonu ho dame domin ne’ebé presiza tenke kontinua, no ita haree mos iha Hotel barak mak komesa loke, ne’e ha’u haree kualidade diak liu kompara ho tinan sanulu (10) liu ba,  inklui iha kreatividades arte jenatu ne’ebé mak iha kualidade diak tebes no kafé original Timor nian ne’ebé mak dala barak ha’u rasik halo promosaun, aproveita wainhira ha’u nia viajen ba rai liur, tanba ha’u dalaruma lori ita nia kafé hodi fó ema bo’ot sira iha estranjeiru, no sira dehan, ita nia produtu ne’e iha kualidade no kapa’as tebes,”dehan Ramos Horta.

Tour de Timor no Dili Maratona Internasional ne’e hola parte iha marketing halo promosaun ba turismu nian.

“Ha’u rasik koalia tiha ona ho maluk sira iha Indonesia, sira ne’ebé mak kaer festival literatura ASEAN Game’s atu bele tulun ita, festival literature iha Timor Leste, iha lingua tolu ka haat (Tetum, Portugues, Melayu no Ingles),”informa Ramos Horta.

Eis Prezidente Repúblika Ramos Horta dehan tan, sei fó apoiu másimu ba eventu ne’e ninia susesu tuir tarjetu ne’ebé iha ona, hodi orgulho ba naran Estadu TL.

Iha fatin hanesan, Sekretariu Estadu Juventude no Desportu (SEJD), Leovigildo da Costa Hornai hateten, eventu Tour de Timor no Dili Maratona Internasional, atu buka promove turismu Timor ba iha mundu internasional, tanba ne’e mak husi parte Guvernu liu husi SEJD hamutuk ho ekipa komisaun organizadora husu apoiu total husi fundador Tour de Timor, José Ramos Horta, liu husi apoiu tékniku, turístiku no moral, nune’e fó susesu ba eventu internasional ne’e.

Enkuantu tuir dadus ne’ebé kolekta husi parte komisaun adminisitrasaun Tour de Timor no Dili Maratona Internasional katak, rejistrasaun hahú la’o tiha ona, iha loron 14 fulan Maiu no sei remata iha loron 30 fulan Agostu,tinan ne’e.

Kona ba dadus detalhada, parte komisaun seidauk fó dadus klaru konaba partsispantes hira mak rejistu ona.

Eventu Tour de Timor ba tinan 2016 ne’e hamutuk ba dala ualu (8) no Dili Maratona Internasional ne’e hamutuk ba dala lima (5). Eventu rua ne’e sei hetan partisipasaun husi atleta Internasional sira, Malaysia, Indonesia, Filipina, Singapore, Thailand, Auatralia no seluk tan.

Kona ba gastus Orsamentu Jeral Estadu tinan 2017, SEJD liu husi apoiu ho total U$ 725.00.

Partisipa iha lansamentu programa ne’e mak hanesan, Premiadu Nobel da Paz, José Ramos Horta, SEJD Leovigildo da Costa Hornai, Koordenador Jeral Tour-Dili Maratona, Joel Maria Pereira, Prezidente  FCTL, Angelo Henriques, Prezidente FTA, Afranio Xavier Amaral, inklui Diretor Jeral SEJD, Metodio Caetano Moniz, ho Diretores Nasional Desportu, João Rodrigues inkui funsiunarius sira.Ito

Jornal Nacional