Xanana Gusmão konvida investidór estranjeiru sira atu kaer oportunidade sira iha nasaun

Ministru Planeamentu no Investimentu Estratéjiku, Xanana Gusmão, horisehik konvida emprezáriu no investidór estranjeiru sira atu aposta iha oportunidade kresente ne’ebé eziste iha nasaun, ne’ebé hakarak diversifika nia ekonomia.

Iha nia intervensaun Xanana Gusmão afirma katak Governu kria ona baze hodi atrai investidór estranjeiru sira, nune’e bele potensia oportunidade sira ne’ebé kontinua eziste ba dezenvolvimentu nasaun nian.

Enkontru emprezariál hanesan sira ne’ebé sei hala’o iha inísiu semana oin, nia destaka, permite atu hetan oportunidades foun no, eventualmente, nia hatete, forma parseria foun hodi "ajuda atu kria ekonomia forte ba dezenvolvimentu sustentável Timor-Leste" nian.

"Dezenvolvimentu ekonómiku Timor-Leste nian sai prioridade nasionál no ho adezaun ba ASEAN iha orizonte, Timor-Leste halo hela servisu hodi kria baze ne’ebé metin ba nia dezenvolvimentu sustentável", nia hatete.

"Iha prosesu ne’e papél setór privadu nian importante tebes no bele ajuda atu kria tan oportunidade ekonómika ba ita-nia parseiru ekonómiku", nia subliña.

Xanana Gusmão ko’alia iha serimónia boazvindas ba konferénsia internasionál investimentu nian iha Timor-Leste, ne’ebé halibur ema atus resin iha Dili iha loron-segunda no tersa.

Enkontru ne’e konta ho partisipante sira hosi Austrália no nasaun oioin hosi rejiaun sudeste aziátiku, ne’ebé kada ida-idak selu besik dólar 2200 ba kontaktu ho responsável públiku timoroan sira no ho emprezáriu nasionál sira.

Xanana Gusmão aproveita diskursu abertura no prezensa australianu sira barak nian hodi renova reivindikasaun timoroan hodi hakarak negosia ho Austrália nia fronteira marítima.

No refere ba oportunidade sira ne’ebé eziste iha nasaun iha setór sira hanesan petroleu no gás naturál, agrikultura, turizmu indústria no manufatura.

Nia hatete katak sira ne’e hanesan area sira iha ne’ebé Timor-Leste bele hasa’e, kria papél ne’ebé relevante liu iha espasu rejionál, iha zona rejiaun leste Indonézia nian, ida ne’ebé mós kiak liu iha nasaun.

Xanana Gusmão esplika katak objetivu mak konsege hakbesik investidór no emprezáriu internasionál no timoroan sira, maibé muda paradigma ne’ebé akontes eto’o iha ne’e, iha ne’ebé "local sira simu komisaun envezde koñesimentu".

"Ami hakarak atu emprezáriu sira aproveita parseria hirak ne’e hodi asume maiór responsabilidade no hodi dezenvolve nia kualifikasaun emprezariál no lideransa iha negósiu", nia subliña.

Governu hatete sei kontinua avansa iha kriasaun banku nasionál investimentu ida, hodi komplementa investimentu internasionál hodi "ajuda atu kria baze lokál parseiru lokál sira-nian iha faze krusiál dezenvolvimentu" nasaun nian.

Konferénsia Internasionál Investimentu Timor-Leste nian, tuir nota ida organizadór sira-nian, hakarak hatudu nia potensiál ba investidór sira hosi nasaun oioin iha area oioin hanesan petroleum no gás, minas, kafé no agrikultura, turizmu, transporte ho konstrusaun, no sira seluk tan.

Entre partisipante sira konta ho prezidente Ajénsia ba Investimentu no Komérsiu Esternu hosi Portugál (AICEP), Miguel Frasquilho, responsável ba organizasaun emprezariál timoroan sira-nian, responsável ba empreza sira, ekonomista sira espesialista sira seluk.

Jornada iha loron-segunda hosi enkontru emprezariál nian sei loke hosi primeiru-ministru, Rui Maria de Araújo.

SAPO TL ho Lusa