BARATA HOBUR HNGV

DILI - Barata kontinua hobur iha sala pasiente sira iha Hospitál Nasional Guido Valadares (HNGV), maske governu kontrata kompañia ida lor-loron fokus de’it ba hamoos fo’er hodi garante ambiente moos.

Xefe Gabinete Kualidade Kontrolu no Komunikasaun Sosiál-HNGV, Americo dos Santos rekoñese, barata kontinua hobur iha sala pasiente sira. Maibé, tuir nia la’ós tanba kompañia mak la halo limpeza, maibé tanba família pasiente sira mak lori sasan barak liu no la kuidadu fo’er mak konvida barata.

“Ami lahatene barata ne’e foin lalais mak mosu barak, barata ida ne’ebé ita haree oin seluk tiha fali, ida ne’e los duni katak fó impaktu ba pasente sira ne’ebé halo tratamentu iha ne’e,” Xefe Gabinete ne’e  hatete ba Timor Post iha nia servisu fatin HNGV, Segunda (04/07).

Americo haktuir, iha pasiente sira ne’ebé halo tratamentu rútinita (baixa) iha ospital lori sasan barak liu, até balun lori bee aqua kaixa tomak, ropa no hahan ne’ebé husik hela iha armariu laran bele hamosu barata.

“Óspital ne’e labele lori sasan barak liu, lori agua mos dala ruma kaixa tomak, sira nia ropa manta sira ne’e hotu mai nakonu iha gaveta, hahan sira ne’ebé lori hosi uma mai tau tama iha laran, haan lahotu hosik hela iha ne’ebá, sira ne’e mak dada barata ne’e mai,” Americo dehan.

Americo hatete, nia parte akompañia kompañia ho naran Caimeleloqui  ne’ebé manan tender ba halo limpeza iha HNGV hala’o servisu ho efektivu, maibé sé pasiente sira rasik mak laiha konsiénsia ba ambiente moos maka susar atu kombate barata.

Diretór Jerál HNGV bolu ona na’in kompañia Caimeleloqui hodi hala’o enkontru avaliasaun iha loron Segunda (04/07) atu bele halo limpeza emfermaria, hosi  medisina Women, interna mane, interna feto, serujia mane, serujia feto to’o sala izolmentu no maternidade.

HNGV mos hasai kedas sirkular ida ba família pasente sira ne’ebé baixa iha HNGV ne’e lori sasan tuir nesesidade moras nian.(f10)

Timor Post