Melhor Klasifikadu iha Academia Naval New Zeland

Not to be the best but try your best

La’os sai di’ak liu maibé koko ó nia-án atu sai di’ak liu

 Lema ida ne’e sai sasukat ida ba Clementino Colo atu homan mehi hodi hadau susesu no futuru ne’ebé nabilan. Mehi hahú hosi mehi. Mehi ne’e rasik nu’udar inspirasaun ida ba nia atu hetan susesu. Mehi homan ho ninia “hakarak” (vontade) ne’ebé forte, lori nia sai melhor klasifikadu durante tuir kursu formasaun ofifisial JOCT (Junior Officer Common Training) iha Academia Naval Nova Zelandia.

Antes atu tuir treinamentu refere durante fulan ne’en (6), hahu iha loron 11 Janeiru—17 Juñu 2016 iha Nova Zelandia, nia halo treinamentu konjunta ho forsa [F-FDTL] kadetes sira hosi forsa tolu Army, Aero no Navy nian.  Iha Academia Naval Nova Zelandia, nia tuir treinamentu fiziku iha envairomentu oi-oin. Iha ne’eba, instrutór sira avalia treinamentu fiziku nian, entre ema 25 ne’e, nia maka hetan primeiru klasifikadu ba fiziku no simu tropy ida.

“Ha’u nu’udar  timoroan orguilho tebes no ha’u hanoin katak Timor mós bele atu kompete iha treinamentu international,” dehan Clemen, oan hosi  Agustinho H. Colo (matebian) no Maria Coa (matebian) ne’ebé moris iha Oe-Cuse, Sacato, 19 Agusto 1984 ne’e ho laran ksolok.

Hafoin treinamentu ramata, iha sira nia graduasaun nia hetan fiar hosi instrutor sira sai nu’udar komandante pelotaun ba sira nia rekrutamentu ne’ebé pasa graduasaun no ofisial ne’ebé  komanda parada.

“Ha’u apresia tebes katak foin primeira ves estudante internasional sai komanda pelotaun iha sira nia serimonia graduasaun ninian. Ha’u senti kontenti no mós sai responsabilidade boot ba serimonia graduasaun ba pelotaun ida hamutuk 25 pessoas,” dehan Segundu Sarjentu ne’ebé kaben ho Cresencia de Jesus ho oan nain 4 (Feto 2 no mane 2) ne’ebé uluk eskola iha STM Don Bosco Fatumaca/Gariuai (2003) ne’e.

Atoni Oe-Cusse nia oan ne’e, hahú tama F-FDTL iha 2004 hodi hili tama Forca Naval iha 2005. Iha 2006, nia hetan oportunidade tuir kursu formasaun de Sargento durante tinan ida iha Metinaro. Iha 2009, nia tuir formasaun hasai kursu de Navegasaun iha China-Dalian Naval Academy. Tinan 2012, nia hasai kursu lingua Ingles iha Australia Melbourne. Tinan 2015, ba hasai kursu preparatoriu Orientation Course ho MAP Students sira hosi Nasaun Pasificos durante fulan ne’en iha Nova Zelandia. Ikus liu, iha Janeiru 2016, nia konkore ba Escola Academia Naval Nova Zelandia nian ne’ebé lori nia sai melhor klasifikadu. Bravo Clemen Colo! (Cassimata)

Matadalan