Korea do Sul Buka Aprende Esperiénsia Timor-Leste

DÍLI, (ANTIL) – Embaixadór Korea do Sul iha Timor-Leste, Kim Ki-Nam halo sorumutuk ho Ministru Negósiu Estranjeiru no Koperasaun (MNEK) Hernani Coelho hodi atualiza pozisaun Timor-Leste kona-ba kazu península Korea ne´ebé sai kestaun mós iha Forum Rejionál Asean ne’ebé realiza iha Centro Convenções Díli (CCD), semana kotuk.

Iha sorumutu ne’e, Ministru Hernani husu Korea atu haree no banati esperiénsia ba kriasaun paz ne´ebé Timor-Leste estabelese ho Indonézia.

“Paz bele prebalese ho tempu ne’ebé maka naruk só bele atinji kuandu parte rua iha konfiansa ba malu enkuantu parte rua la iha konfiansa ba malu difisil atu atinji paz no estabilidade iha ita nia rejiaun”, Hernâni Coelho ba ANTIL iha MNEK, Praia dos Coqueiros, Kuarta, (10/8).

Nia hatutan katak hatudu forsa militár sei la rezolve problema, maibé dalan loos liu maka rezolve liu hosi dialógu jenuinu, liu-hosi entendimentu, liu hosi konfiansa hodi konstrui parte rua ne´e.

“Tanba ne’e mak ita apoiu prinsipiu six party talk, apoia projetu ida sira hanaran katak trusth building and confidence building iha península Koreia nian ita apoiu prosesu dialogu entre Koreia nian,” nia esplika.

Kazu Korea do Sul no Korea do Norte akontese dezde tinan 1950 ne´ebé hanaran Armistis no la iha akordu ba paz tanba ne´e to´o agora sei iha desintendimentu hodi konflitu kontinua la´o.(jornalista: Rafy Belo  Editora: Rita Almeida)

Foto: Embaixadór Korea do Sul iha Timor-Leste Kim Ki-Nam hasoru malu ho Ministro Negósiu Estranjeiru no Koperasaun (MNEK) Hernani Coelho hodi ko´alia kona-ba pozisaun Timor-Leste ba kazu Korea do Sul ho Korea do Norte iha MNEK, Praia dos Coqueiros, Kuarta, (10/08). Foto Mídia MNEK