PM Rui Fahe Informasaun ODS ba Sivitas Akadémika

DILI, (ANTIL) – Primeiru Ministru (PM), Rui Maria Araújo fahe informasaun kona-ba Objetivu Dezenvolvimentu Sustentavel (ODS) ba sivitas akadémika Universidade Nasionál Timor Lorosa’e iha kampus Kaikoli, Kuarta, (10/8).

Reitór UNTL, Francisco Martins konsidera, ODS importante teb-tebes ba akadémiku sira.

”Importante atu ita haree, diskute, debates tuir ita nia área no fakuldade ne’ebé iha UNTL”, katak reitór.

Nia dehan, liu-hosi diskusaun kle’an mak sivitas akadémiku bele hatene koloka-án, oinsá mak partisipa iha prosesu dezenvolvimentu TL.

Atu atinji ODS, tuir reitór, papel UNTL importante liu mak eleva kualidade rekursus umanus ne’ebé adekuadu, elevada no avansada ba joven Timor tomak.

Iha biban ne’e, diskursu PM Rui Maria Araujo husu ba UNTL ajuda polítika ODS atu atinji mehi ne’ebé mak iha ona.

ODS sai prioridade nasionál sira governu konstitusionál VI nian ba 2017, ne’ebé haree liu ba agrikultura (luta kontra hamlaha no laiha nutrisaun), saúde, edukasaun, bee no saneamentu, infraestrutura bázika no eleisaun iha tinan oin.

Prioridade sira ne’e tama iha kuadru ne’ebé luan liu iha planu dezenvolvimentu estratejiku 2011-2030 no programa governu konstituisional VI tinan 2015 to’o 2017.

Prioridade hirak ne’e identifika liu-hosi servisu ne’ebé governu hala’o to’o oras ne’e atu-bele hatama ODS nian iha planeamentu hotu no iha orsamentu governu nian ba tinan 2017.

Grupu servisu ida hosi governu nian ba ODS, harii hafoin meta sira ne’e adota iha konferénsia Nasoens Unidas nian iha tinan kotuk, ne’ebé estuda ona no to’o oras ne’e objetivu 17 ne’ebé define ona nomos identifika forma sira kona-ba oinsá atu alkansa objetivu sira ne’e iha TL.

Grupu ne’e servisu iha koordenasaun no konsulta ne’ebé besik ho órgaun governu nian sira hotu, organizasaun sira sosiedade sivíl no parseiru dezenvolvimentu nian sira.

Hamutuk, hotu-hotu iha komprimisiu atu habelar informasaun sira kona-ba dalan hirak ne’ebé hetan ona atu konkretiza ODS nomis servisu hamutuk ho parte interesada sira iha monitorizasaun ba evolusaun no aprezentasaun hosi rezultadu sira.

Prioridade nasionál sira ba 2017 signifika governu sei haree liu ba objetivu sira iha númeru 2 (nutrisaun no seguransa ai-han), númeru 4 (edukasaun) no númeru 9 (infrastrutura sira), maibé la haluha mós objetivu sira seluk kona-ba dezenvolvimentu umanu, hanesan saúde (ODS númeru 3), igualdade jéneru (ODS númeru 5) bee no saneamentu (ODS númeru 6).

Eleisaun prezidensiál sira ne’ebé sei hala’o iha semestre dahuluk tinan 2017 nian, tuir fali ho eleisaun lejizlativa sira, iha   semestre daruak  iha tinan hanesan maka hanesan mós prioridade sira seluk ba 2017 nian. (jornalista: Manuel Pinto; editora: Rita Almeida)

Foto: Primeiru Ministru, Rui Maria Araújo akompaña hosi Reitór UNTL Francisco Martins no Dekanu Fakuldade Siénsia Sosiais. Foto ANTIL/Manuel Pinto.