AS Ponta Leste Kampiaun Tasa 12 Novembru

DILI, (ANTIL) - AS Ponta Leste sai kampiaun ba Tasa 12 Novembru 2016 hafoin halakon Assalam FC 1-0 iha jogu finál iha Estádiu Municipál Dili, Sábadu (10/9).

Golu úniku hosi jogadór médiu, Silveiro Garcia iha minutu (61) lori Ponta Leste ba kampiun Tasa 12 Novembru ba époka ida ne’e.

Lakon ho AS Ponta Leste, Assalam FC sai hanesan segundu klasifikadu iha Tasa refere. Segundu klasifikadu hetan prémiu osan Dólar Amerikanu 6,000.00 ho medalla.

Entretantu, nu’udar primeiru klasifikadu, AS Ponta Leste hetan osan Dólar Amerikanu 12,000.00 ho medalla.

Treinadór Assalam FC, Simon Pablo hateten maske lakon maibé orgullu tanba sira bele sai segundu klasifikadu. Nia rekuñese katak AS Ponta Leste hatudu joga di’ak, tan ne’e defisil ba sira atu fera defeza AS Ponta Leste hodi rezulta golu.

“Jogadór AS Ponta Leste iha esperénsia joga no domina bola ho kalma tebes. Tan ne’e, sira merese sai kampiaun,” Pablo haktuir.

Entretantu, Treinadór AS Ponta Leste, Eduardo Pereira hateten nia kontenti tebes tanba bele lori nia klubu ba kampiaun. Nia haktuir tinan kotuk sira esforsu án atu sai kampiaun ba Tasa refere maibé la konsege. Maibé, nia dehan, tinan ida ne’e sira atinji sira nia mehi.

Eduardo informa katak adversáriu (Assalam FC) mós joga di’ak maibé esperénsia lá to’o sira tanba jogadór AS Ponta Leste mesak selesaun Nasionál de’it.

Aleinde kampiaun, jogadór AS Ponta Leste, Adelino Coelho mós hetan prémiu motór Mio ida tanba mellór markadór durante jogu Tasa 12 Novembru 2016. (Jornalista: Xisto Freitas / Editor: Gantry Meilana)

Foto: Jogadores AS Ponta Leste hiit hela tasa primeiru kampiaun nian nu´udar jestu selebra vitória iha Tasa 12 Novembru époka 2016. Foto ANTIL/Xisto Freitas