Esperansa ba Eleisaun Suku mak Labele Kahur Polítika

DILI, (ANTIL) – Eleisaun ba lideransa suku ne’ebé sei akontese iha loron 30 fulan ne’e ho esperansa sei la-kahur ho polítika tanba, komunidade sira iha nível suku koñese malu ho didiak hodi hili sira nia lideransa lokál.

”Kandidatura ne’e hothotu independénte maibé, la-signifika la mai hosi ema partidu, em prinsípiu lakohi atu polítiza suku sira, maibé hakarak povu ne’e moris ho natureza sosiál, oinsá povu bele haree malu ho di’ak tanba, koñese malu”, Ministru Estadu Koordenadór asuntu Administrasaun Estadu e Justisa no Ministru ba Administrasaun Estatál, Dionísio Babo Soares ba jornalista sira foin lalais ne’e iha Dili.

Ho esperénsia ne’ebé liu ona, tuir nia, polítika sira labele fahe povu iha nível kraik, povu tenke moris hakmatek hodi hili ema ne’ebé iha duni kompeténsia atu ukun no lidera, labele tan kor polítiku.

”Polítika ne’e eleisaun jerál mak vota de’it, maibé nível suku ne’e di’ak liu lalika polítiza tanba, ita nia situasaun seidauk to’o faze iha maturidade polítika ne’e a’as tebes”, Babo realsa.

Eleisaun suku ne’ebé atu akontese, ho esperansa atu oinsá ema ida mak hetan fi’ar hodi lidera, labele mosu hanoin ida hosi povu katak, hosi partidu A ka B maibé oinsá atu haree serbisu ba oin hodi servi.

Konsellu Ministru dekreta ona loron atu hala’o sorumutu Asembleia Aldeia nian no Konsellu Suku nian ho ninia objetivu atu konstitui meza eleitorál no simu kandidatura ba Xefi Suku ne’ebé sei hala’o iha loron 15 fulan-Setembru.

Sorumutu Asembleia Aldeia nian sira ne’ebé hala’o ho objetivu atu hili delegadu Aldeia nian sira ba Konsellu Suku, nune’e mós Xefi Aldeia sira no Xefi Suku sira sei hala’o iha loron 30 fulan-Setembru.

Depois apuramentu, sei hala’o sorumutu iha loron 1 fulan-Outubru. Kuandu akontese eleisaun ba daruak, sei hala’o iha loron 7 fulan-Outubru ho apuramentu iha loron 18 fulan-Outubru.

Sorumutu Konsellu Suku atu hili Lian-na’in no reprezentante juventude sira marka ona ba loron 22 fulan-Outubru.

Forma eleisaun suku bazeia ba lei númeru 9/2016 sei hala’o eleisaun suku ho modu sufrájiu, diretu, sekretu, livre no pesoál.

Konsellu suku kompostu hosi xefi suku, aldeia no delegadu no delegada ne’ebé sei hili hosi komunidade iha nível aldeia, enkuantu joven mane ida ho joven feto ida ho tinan 17 to’o 30 no lia nain ho idade boot liu iha suku ididak sei hili hosi asembleia suku. (jornalista: Rita Almeida)

Foto: Ministru Estadu Koordenadór asuntu Administrasaun Estadu e Justisa no Ministru ba Administrasaun Estatál, Dionísio Babo Soares halo intervista ba jornalista sira foin lalais ne’e iha Dili. Foto ANTIL/Rita Almeida