DOM VIRGÍLIO: TIMOROAN HOTU TENKI KONTRIBUI BA PAZ NO DAME

Bispu Diocese Díli, Dom Virgílio do Carmo da Silva, SDB  husu ba Timoroan tomak, hotu-hotu tenki haka’as-an hodi kontribui ba paz no dame iha nasaun doben ida ne’e.

“Nu’udar sarani, nomós nu’udar Timoroan, ita hotu haka’as-an atu kontribui ba paz ho dame”, hateten Dom Virgílio do Carmo da Silva ba Jornalista, hafoin partisipa kongresu of East-Asia Oceano Salesian Family ba dala 11, iha Centro Convençõens Díli (CCD) Kuarta (5/10).

Dom Virgílio da Silva haklaken katak, atu garante paz ho estabilidade labele hein deit Polisia Nasional Timor Leste (PNTL), ho Falintil Forsa Defeza Timor Leste (F-FDTL), maibé hotu-hotu iha knar atu responsaliza ba  paz ho dame.

“Ha’u husu ba foinsa’e sira, Timoroan hotu, ita hatene katak, iha Díli laran ne’e, ita nia jovens ho labarik ne’e barak liu. Sé joven ho labarik hot-hotu iha hanoin di’ak konaba rai doben ida ne’e, entaun tenki fó liman ba malu, atu lori rai ne’e ba oin,”Dom Virgílio apela ba Timoroan hotu.

Dom Virgílio da Silva husu nafatin ba jovens, alunus, nomos ba sira ne’ebé maka servisu, ida-idak haree hala’o ninia knar no komprimisu.

“Sé ita maka lakohi hala’o ita nia knar ho komprimisu, ita ba buka atu ransu tuur iha estrada fuma, buka gdroga buka buat sira ne’e hotu, entaun  ita maka kontribui ba iha instabilidade iha ita nia rai laran,”Dom Virgílio salienta.

Tuir Dom Virgílio da Silva katak, haree ba en jeral situasaun iha iha rai laran ne’e kalma, maibe iha kazu ida rua ne’ebé dalaruma mosu hanesan ema hana malu, sunu uma, tuda kareta, ne’e individu ida-rua iha kotuk.

“Ita haree en jeral, situasaun ne’e kalma, iha kazu ida rua ne’ebé dalaruma mosu ita rona ema hana malu, ema sunu uma, ema tuda kareta, ne’e iha individu ida rua iha kotuk, dalaruma lanu, karik situasaun polítika nian provoka entaun sei mosu nafatin buat sira ne’e hotu. Maibé ha’u husu ba sarani hot-hotu katak, nu’udar Timoroan, sé kuandu hadomi rai ida ne’e, entaun buka atu hadia,” Dom Virgílio da Silva apela.eni 

Jornal Nacional