PNTL La-Autoriza Membru Sai Broker

DILI, (ANTIL) – Komandu Polísia Nasionál Timor-Leste (PNTL) sei prosesa membru, inklu pessoál balun iha Corpu Seguransa Pessoál (CSP) ne’ebé diskonfia sai broker maibé presiza faktu no keixa hosi komunidade sira.

Segundu Komandante Jerál PNTL, Komisariu Faustino da Costa hateten, komunidade no sosiedade sivil presiza hato’o keixa ba komandu kona-ba membru CSP ne’ebé maka diskunfia sai broker, nune’e komandu bele prosesa membru ne’e hodi foti desizaun ruma.

Ba jornalista sira foin lalais ne’e, Komisariu Faustino esklarese, komandu PNTL laiha informasaun kona-ba membru CSP sai broker iha instituisaun governu balun hodi hetan lukru, maibé se ida ne’e akontese maka husu ba komunidade no sosiedade tomak atu hato’o keixa nune’e bele prosesa ema sira ne’e tanba, regra PNTL la-autoriza pessoál ida sai fali broker.

To’o oras ne’e komandu sidauk simu informasaun pessoal CSP involve sai hanesan broker maske mídia no sosiedade sívil fó sai no kestiona kona-ba ida ne’e, aliende ne’e komandu mos hetan kontaktu balun hosi prezidente komisaun B parlamentu ne’ebé maka trata asuntu seguransa defeza no negosiu estranjeiru David Diaz Ximenes Mandati konaba asuntu ne’e maibé ofisialmente seidauk iha karta ruma ne’ebé maka hateten katak membru A, B ou C tanba, ne’e karik iha bele hato’o keixa para loke prosesu.

Segundu komandante ne’e esplika tuir manuál kona-ba CSP define katak kada fulan 6 tenke halo rotasaun ba membru CSP ne’ebé maka eskolta ba alta entidade, maibé komandu PNTL entfrenta duni katak dala ruma susar oituan tanba, membru governu sira sempre husu atu ema sira ne’e mantein razaun, toman malu no haree malu hanesan maun alin ou inan aman ho oan.

Problema ne’ebé maka PNTL infrenta maka desde tinan 2000 no 2001 kuandu sai polísia membru balun sai eskoltu ba alta entidade to’o agora seidauk iha rotasaun maske komandu hasai ona ordem atu halo rotasaun hodi troka membru sira ne’e, maibé kestaun sentimentu familiár maka difikulta atu halo rotasaun.

Antes ne’e, prezidenti komisaun B trata asuntu defesa seguransa David Dias Ximenes Mandate mak kestiona hodi diskunfia membru CSP balun sai broker. Maibé bainhira parte kompetente hakarak aprejenta faktu, nia parte prontu atu kolabora. (jornalista: Manuel Pinto; editor: Gantry Meilana)

Foto: Segundu Komandante PNTL, Komisariu Faustino da Costa. Foto espesial