Deskonfia La’en Pratika Adulteiru, Feen husu Divorsiu

DILI — Arguida Maria Olga do Carmo husu divórsiu, tanba deskonfia la’en selingkuhho subriña. Tuir arguida , nia subriña ne’e hela ho nia dezde sei idade ki’ik, nune’e , nia maka suporta ba eskola to’o ikus  nia subriña ho naran inisiál F, hetan  servisu, ikus selingkuh fali ho nia la’en, nune’e ikus sira na’in rua feen la’en,  tenke  moris separa malu, alias divórsiu.

Tuir akuzasaun hosi Ministériu Públiku katak, loron 26 outubru tinan 2012, tuku 11 dadersan iha loja 88 Merkadu Lamania oin, lezadu Estanislau da Cruz  ho nia oan ho arguida nia subriña inisial F ba sosa ai-funan iha loja 88.

         

Nune’e bainhira arguida liu ho karreta, haree lezadu sira sosa ai-funan, arguida hakiduk karreta mai para. Bainhira tuun ba arguida hakat ba husu xave karreta iha lezada, no arguida ho intensaun atu baku nia subriña inisiál F ne’ebé maka durante ne’e nia deskonfia selingkuhho lezadu.

Ho hirus arguida hasé, afinál imi maka iha ne’e, tan ne’e,  arguida atu basa inisiál F iha ema barak nia oin, nune’e lezada tenta atu satan netik, hodi arguida nia liman basa dala rua iha lezadu nia hasan parte loos.

Ho aktu ne’e, Ministériu Públiku konsidera arguida komete krime ofensas integridade fízika simples ho natureza violénsia doméstika.

Hafoin rona akuzaun, arguida Maria Olga do Carmo hatete, intensaun nia tuun ba hadau  save iha lezadu, no nia hirus tebes nia subriña ne’ebé la’o hamutuk, tanba durante ne’e, nia la’en selingkuhho nia subriña hodi sira na’in rua moris separa malu ona.

“Ha’u hirus tebes , nune’e ha’u tuun atu basa inisál F, maibé halai ba subar iha ai-funan okos.  Ami na’in rua iha ona oan na’in rua, maibé tanba selingkuh, ikus tenke moris separa malu ,” deklara Arguida.

Nune’e lezadu Estanisalu da Cruz iha nia deklarasaun katak,  nia moe tanba arguida tuun atu baku inisiál F iha ema barak, nune’e nia intensaun atu ba satan netik, nune’e hodi evita problema labele mosu, ikus arguida basa nia dala rua.

“Arguida tuun hosi karreta ho hirus, nune’e nia hakat atu ba basa inisiál F iha ema barak, nune’e ha’u moe, ha’u hamriik hodi satan netik, arguida hodi basa ha’u dala rua iha parte hasan loos,” deklara lezadu.

Lezadu hatutan, durante ho arguida moris hamutuk iha ona oan na’in rua, maibé nia kaer toman arguida selingkuhho mane seluk, nune’e nia hirus hodi moris separa ho arguida.

Hafoin rona parte rua, Tribunál adia kazu ne’e hodi kontinua iha loron 14 dezembru tuku 11:00 hodi rona deklarasun hosi sasin ho inisiál F. 

Audénsia julgamentu ne’e prezide hosi Juiz  Singulár Maria Modesta, Ministériu Públiku reprejenta Prokuradór  Reinato Bere Nahak, arguida hetan asisténsia legál hosi Defensór Públiku, Eustaqio Guterres. (max)

Timor Post