PD Du’un Ministri Estanislau Benefisia Projetu ba Familia

DILI – Lideransa Partidu Demokratiku (PD) iha Parlamentu Nasionál  halo akuzasaun kontra Ministru Estadu Koordenador ba assuntu Economia Dezenvolvimentu no Ministru Agrikultura no Peskas (MAP), Estanislau Aleixo da Silva fó projeitu hadi’a  tratór  bo’ot hamutuk 115 ba nia rian mak hadi’a , maibé parte kompañia rejeita kedas deklarasaun hosi PD nian, tanba kompañia iha abilidade profisional kona – ba halo manutensaun ba tratór  sira.

Deputadu PD, Virgilio Hornai kestiona maka’as MAP kona – ba prosesu manutensaun tratór bo’ot sira la liu hosi  prosesu aprovisionamentu, maibé liu hosi  ajudikasaun direita de’it.

Deputadu Virgilio mos konsidera Ministru Estanislau laiha kapasidade hodi aprezenta nia programa, maibé hatudu de’it nia inkapasidade hodi desakredita de’it ema seluk.

“Nia ko’alia kona – ba tratór  a’at. Agora sé mak halo single sourcehodi fó ba nia nia família  de’it. Nain ba kompañia Liberti Lorosa’e ne’e ninia rian. Ida ne’e iha tendénsia  nepotizmu, tanba prosesu manutensaun ba tratór  sira ne’e la liu hosi  aprovisionamentu normál. Nia halo de’it ajudikasaun direita ba ninia rian,” hatete deputadu Virgílio Hornai ba Jornalista sira iha Parlamentu Nasionál , Sesta semana kotuk.

Hatan kona – ba akuzasaun ne’e, Ministru Estanislau justifika katak iha prosesu inisiu halo liu hosi  prosesu aprovisionamentu, maibé depois lakonsege hetan kompañia ne’ebé  priense kriteria no tanba persiza atu hadi’a  lalais, entaun desidi hodi fó ba kompañia rua, la’ós  fó ba ida de’it. Ida Timoroan, ida Indonézia.

“Tempu la to’o ona, ami tarde, udan be’en mos komesa monu ba rai ona. Tender halo tiha ba dala rua, lahetan ema ne’ebé  priense kriteria mak fó fali ba seluk. Ne’e lei aprovisionamentu fó dalan. Maibe, la’ós  ha’u mak desidi,” hatete Ministru Estanislau ba Jornalista sira iha Parlamentu Nasionál , Sesta semana kotuk.

Eis deputadu FRETILIN ne’e hatutan, iha tempu ne’eba ekipa ida mak intervista kompañia sira hodi haré sira iha kbi’it ka la’e, tanba sira iha kbi’it mak fó projetu ne’e ba sira hodi hadi’a  tratór  sira.

“Tinan ida ne’e hadi’a  liu hosi  loke konkursu normál, maibé tinan kotuk la’e, tanba urjénsia. Tuir lolo’os  ne’e ami foti fó ba ida de’it ona, tanba bele ona. Lei permite,” esplika Estanislau.

Estanislau mos rejeita akuzasaun hosi  deputadu Virgilio Hornai nian, tanba kompañia nasionál  ne’ebé  hadi’a  tratór  hamutuk 115 iha tinan kotuk ne’e laiha relasaun família  ho nia.

“Ida ne’e laiha relasaun família ho ha’u. Ha’u nia oan sira la serbisu iha governu no ha’u nia alin sira nunka hetan projetu hosi  governu, ema ne’e sim, ha’u nia Aman mak haki’ak señora ne’e, maibé señora ne’e mos mate restu 12 Novembru,” nia hatete.

Entretantu, diretór  ejekutivu kompañia Liberti Lorosa’e, Teotonio Guterres, nu’udar Estanislau nia alin haki’ak nia espoza, mos rejeita totál  akuzasaun deputadu Virgilio Hornai, tanba nia iha esperiénsia  profisional kona – ba oinsá  hadi’a  tratór  sira.

“Ha’u rejeita totál , tanba ha’u koñese  Ministru Estanislau di’ak liu kompara ho deputadu Virgilio Hornai. Ha’u hetan projetu ne’e bazeia ba ha’u nia profisionalizmu nu’udar mekániku  ida iha Timor,” hatete Teotonio ba Timor Post iha Gino’s Hotel, Dili Tersa (29/11).

“Tempu ona para ha’u mak halo manutensaun ba tratór  hirak ne’e. Kuandu laiha ona planu para atu akuza malu, labele ko’alia fali evidénsia  sira seluk,” Teotonio hatutan.

Nia konsidera akuzasaun hosi  deputadu Virgilio Hornai ne’e normál hanesan deputadu, maibé exseptu ema karpinteiru ida mak hadi’a  fali tratór  ne’e mak laloos ona ka fó nia mak ba fa’an tutan fali ba kompañia seluk hodi hadi’a  ne’e mos ladun di’ak ona.

“Maibe fó ba ha’u, tanba ha’u nia profisaun kona – ba area ne’e duni. Antes ita ukun a’an mos ha’u ema mekániku  ona, entaun ha’u iha direitu ba serbisu ba area ida ne’e, la’ós  Ministru fó de’it,” esplika Teotonio.

Nia hatutan, totál  ne’ebé  nia hadi’a  iha tinan kotuk mak tratór  bo’ot sira hamutuk 115 ho nia valor orsamentu U$225.750. Entretantu, kompañia Tratór  Indonézia hadi’a  tratór  sira seluk  kuaje hetan U$300,000. Oras ne’e dadauk mos kompañia Tratór  Indo mak kontinua hadi’a  fali. (oki)

Timor Post