Forsa Fuzileru-Espesialidade Nain 79 Ohin Simu Graduasaun

DILI, (ANTIL) - Komponenti Naval FALINTIL-Forsa Defesa Timor-Leste (F-FDTL), Sesta (16/12) gradua tan forsa fuzileru hamutuk na’in 41 no espesial na’in 38 iha Metinaro, Dili, hafoin tuir treinamentu durante fulan hira nia laran.

Komandante Komponenti Naval, Kapitau Fragata Amandio Adão do Brito hateten, kursu formasaun iha komponenti Naval hanesan pasu atu fundamenta ezistensia komponenti naval nia estrutura.

“Formasaun inportante ba militar ida-idak, atu adopta án iha nia servisu. Tanba hili ona dalan atu sai marina,” Kapitau Fragata Amandio Adão do Brito afirma.

Nia hatutan, formasaun la’ós hotu ona ba ida-ne’e, maibé atu sai marinerus di’ak tenki aprende ba bei-beik hodi iha kapasidade sufisiente, hodi kontribui ba nasaun Timor-Leste. “Presiza servisu ekipa, hodi responde ba plataforma ne’ebé mak iha,” nia dehan tan.

“Komandu militar husu ba formandu ba kursu militar espesialidade ba dala 6, fuzileru ba dala haat no militar komponenti naval sira hotu, atu aprende no estuda maka’as iha ida-idak nia area hodi hala’o kna’ar, responsabilidade estadu no povu ne’ebé atribui hela ba ita,” Kapitau Fragata, Amandio Adão do Brito fó hanoin.

Iha fatin hanesan, reprezentante Brigaderu Jeneral, Kapitau Fragata João da Silva, lori instituisaun F-FDTL agradese ba treinamentu no eventu promosaun no graduasaun.

“Ba ita boot sira nia treinamentu la’ós fasil maibe ita boot sira konsege ultrapasa hodi hetan graduasaun ne’e pasu di’ak hodi kontribui prosesu dezenvolvimentu komponenti naval no F-FDTL,” Kapitau Fragata João da Silva afirma.

Seremonia graduasaun ne’e partisipa hosi família, asiste mós despedida ba treinador sira tanba sei fila hikas ba Portugal, Sabadu (17/12). (Manuel Pinto/Editór: Otelio Ote)