Governu Aprova Ona Lei Rejime Jerál Floresta

DILI, (ANTIL)- Governu Repúblika Demokrátika Timor-Leste (RDTL), liuhusi Konsellu Ministru aprova Lei Rejime Jerál  Floresta, Sesta-feira (16/12)  iha Dili no sei haruka ba Parlamentu Nasionál atu halo diskusaun no halo aprovasaun.

Ministru Agrikultura no Peska, Estanislau Aleixo da Silva informa ida-ne’e ba jornalista sira, hafoin enkontru Konsellu Ministru.

“Lei ne’e la’ós regula de’it floresta nativa no rezevais florestais, maibé floresta hanesan atividade  privada, plantasaun privada no komunitária nian,” nia esplika.

“Husu ba Parlamentu bele aprova ne’e ho prioridade, atu tinan oin mai iha ona lei ne’e no Governu foun uza ona lei ne’e hanesan baze legál, atubele regula atividade floresta sira iha  rai laran,” Ministru Estanislau hateten. Timor-Leste iha ona Dekretu Lei kona-ba área protejida no Lei Ambiente.

Hafoin arpovasaun ba lei ne’e, Governu sei halo fali Dekretu Lei ba jestaun floresta no Dekretu Lei biodiversidade. Nune’e sai pakote ida, hodi regula atividade floresta no ambiente. “Bainhira aprova ona Lei Rai, reforsa liután propriedade kona-ba floresta,” ministru dehan tan. (Jornalista : Maria Auxiliadora/Editór: Otelio Ote)

Foto: Ministru Estadu Koordenadór ba asuntu Ekonómiku, Ministru Agrikultura no Peskas, Estanislau Aleixo da Silva. Foto espesiál