Apropria Osan Banku ANZ, AMB Ameasa Suspensaun

DILI - Liu husi alegasaun final, Ministeriu Publiku (MP) husu ba tribunal atu aplika pena prizaun tinan rua no suspende tinan rua ba arguida AMB, neebe komete rime furtu agravadu. Nee previstu iha Artigu 252 Kodigu Penal Timor Leste. Tanba nee, iha audensia julgamentu, MP husu ba tribunal atu aplika pena prizaun tinan rua, suspende tinan rua ba arguidu AMB.

Alende nee, husi parte defeza husu ba tribunal atu aplika pena neebe adekuada ba arguidu,  tanba iha deklarasaun arguida nian katak osan nee arguida fo fila ona. Elementu ba krimi nee la prinse ba iha krimi furtu agravadu neebe previstu iha artigu 252 kodigu penal Timor Leste.

Rona tiha husi parte rua tribunal adia ba 24/10, oras 16:00 hodi submete ba iha desizaun final.

Tuir akuzasaun husi MP katak, Iha loron 12 fulan Maio 2015, tuku 17:00 iha ANZ Sukursal, Timor Plaza Comoro Dili, iha altura neeba parte husi Complianse Manager hetan informasun katak iha balkaun arguida nia osan menus Short diference hamutuk USD $ 2000.00 rihun rua.

Arguida servisu hanesan funsionariu balkaun Teler iha ANZ surkursal Dili komesa iha Marsu tinan 2015 no remata iha Jullu tinan 2015.

Iha atividade nudar funsionariu balkaun Banku ANZ nian, arguida simu osan husi kliente banku nian depois hatama osan refere ba iha armariu besi Brancas.

Iha loron refere arguida simu osan husi kliente sira, arguida apropria tiha osan ho montante USD $ 2000.00.

Bainhira arguida foti tiha osan nee arguida rai subar iha envelope nia laran no sikat osan refere ba dokumentu nia leet iha arguida nia balkaun.

Iha loron 15 fulan Maio 2015, kuandu funsionariu ida halo limpeza iha balkaun arguida nian maka hetan fali osan ho montante refere iha envelope laran neebe sikat hela ho dokumentu nia leet. Nunee Banku ANZ Sukursal Dili loke kedas investigasaun hasoru arguida.

Arguida halo hahalok nee ho livre, deliberada no konsientemente ho intensaun maske nia hatene katak, nia hahalok nee sei la permiti no kriminalmente sei hetan kastigu tuir lei penal.

Ho razaun sira nee MP akuza arguidu AMB komete krimi hanesan autor material ho forma tentadu krimi furtu agravadu neebe previstu iha artigu 252 kodogu penal Timor Leste.

Audensia Julgamentu nee prezidi husi juis Koletivu, Antonino Goncalves, Jumiaty Freitas, Albertina Neves, ministeriu publiku reprezenta husi Pedro Batista, Arguidu hetan asistensia legal husi Defensor Publiku Marsal Mascarinhas.*

Suara Timor Lorosae