Kazu Taibessi Sei Iha Prosesu Investigasaun

DILI - Relasiona ho kazu konfrontus neebe maka akontese iha Taibesi, foin lalasi nee, hodi resulta vitima Adelino mate iha fatin, kazu nee rasik sei iha hela prosesu investigasaun.

Tuir Komandante Jeral Polisia Nasional Timor-Leste (PNTL) komisariu Julio da Costa Hornay katak relasiona ho kazu konfrontasaun Taibesi dadaun nee sei iha prosesu investigasaun.

“Suspeitu ba kazu nee rasik ita kaer ona hamutuk ema nain tolu proseu investigasaun lao hela aver se iha tan suspeitu seluk relasiona ho kazu nee,” dehan Komisariu PNTL Julio Hornay ba jornalista sira hafoin remata enkontru semenal ho Prezidente Republika Francisco Guterres Lú Olo, iha palasiu Prezidensial Bairo Pite (5/10/2017).

Komandante jeral PNTL nee mos hatutan liu tan alemde kazu Taibesi iha kazu krimi seluk hanesan kazu homesidiu, neebe maka akontese iha Batugade. Tamba ema deskonesidu neebe maka oho vitima hodi soe no husi polisia hetan ona vitima nia isin mate, maibe ba kazu nee rasik mos sei iha investigasaun no oras nee lao hela atu buka tuir autor neebe maka halo aktus krimi nee. 

Natalino Costa | Suara Timor Lorosae