Lu-Olo simu bispu sira iha loron-sesta hodi analiza situasaun polítika

Prezidente Repúblika timoroan, Francisco Guterres Lu-Olo, simu iha loron-sesta, iha Díli, bispu timoroan na'in tolu hodi rona opiniaun kona-ba situasaun polítika iha Timor-Leste no posibilidade Governu monu.

Iha komunikadu, Prezidénsia esplika katak reuniaun ho bispu sira Basílio de Nascimento, hosi dioseze Baucau, Virgílio do Carmo da Silva (Díli) ho Norberto do Amaral (Maliana) hala'o iha loron-sesta dadeer iha Palásiu Prezidensial iha kapital timoroan nian.

"Prezidente hakarak hasoru malu ho bispu sira hosi Dioseze Baucau, Díli ho Maliana hodi rona opiniaun kona-ba situasaun polítika ne'ebé maka nasaun hasoru, tanba opozisaun hosi Parlamentu Nasional hodi rejeita Programa hosi Governu Konstitusional dahitu", esplika hosi nota.

Komunikadu fó hanoin katak Igreja Katólika iha Timor-Leste iha ona knaar importante ida iha luta ba independénsia no kontinua iha nafatin knaar signifikativu "iha konstrusaun nasaun" timoroan nian.

Nota esplika katak, leinde líder relijiozu sira, xefe Estadu hakarak rona opiniaun hosi sosiedade sibil no hosi entidade sira seluk ne'ebé bele kontribui hodi hetan solusaun polítiku ne'ebé iha benefísiu ba Timor-Leste.

Iha loron-domingu, gabinete Prezidente nian fó sai ona kona-ba enkontru ida ne'ebé sei halo iha loron 15 Novembru ho líder sira hosi partidu boot tolu timoroan nian, liuliu ho Mari Alkatiri, sekretáriu-jeral hosi Frente Revolucionária do Timor-Leste Independente (Fretilin), Xanana Gusmão prezidente hosi Conselho Nacional de Reconstrução de Timor-Leste (CNRT) no Taur Matan Ruak presidente hosi Partidu Libertasaun Popular (PLP).

Governu minoritáriu, apoia hosi deputadu na'in 23 hosi Fretilin no na'in hitu hosi Partidu Demokrátiku (PD), hasoru ona proposta rejeisaun nian hasoru nia programa ne'ebé aprova iha fulan liubá hosi bloku opozisaun ne'ebé inklui CNRT, PLP ho Kmanek Haburas Unidade Nacional Timor Oan (KHUNTO).

Ezekutivu prepara hela programa foun ida hosi Governu, hodi aprezenta to'o tinan ne'e nia rohan, ne'ebé maka ohin aprova ona Orsamentu Retifikativu ba tinan 2017 ne'ebé sei entrega iha Parlamentu Nasional to'o loron-kinta.

Opozisaun kritika ona, desizaun hosi Governu hodi aprezenta orsamentu - hodi argumenta katak iha osan iha konta públiku sira ne'ebé sufisiente to'o tinan ne'e nia rohan -, no mós ba aprezentasaun antes lori fali programa foun ba deputadu sira.

Bainhira programa Governu nian la liu fali, ezekutivu sei tuun no Prezidente Repúblika tenki desidi entre solusaun governativu seluk iha senáriu parlamentar atual ka konvoka eleisaun foun sira.

Hafoin eleisaun sira, CNRT, ne'ebé hanesan partidu daruak ne'ebé hetan liu votu, fó sai ona katak hakarak sai hanesan opozisaun, maibé agora aprova ona hodi hahú konversasaun formal sira hodi harii Aliansa Maioria Parlamentar (AMP) ida ne'ebé hakarak sai hanesan alternativu ba Governu Fretilin nian.

SAPO TL ho Lusa