Primeiru-Ministru Informa Orsamentu Retifikativu ba Prezidente Repúblika

DILI, (TATOLI) – Primeiru-Ministru, Marí Bin Amude Alkatiri, ohin relata proposta Orsamentu Retifikativu ba Prezidente Repúblika, Francisco Guterres Lú Olo, iha Palásiu Prezidensiál Nicolau Lobato Bairo Pite.

Xefe  Governu hateten orsamentu retifikativu 2017 hamutuk milloen 200 resin ne’ebé soma ho Orsamentu Jerál Estadu 2017 hamutuk billaun 1.66.

ʺLa’ós orsamentu retifikativu maka billaun ida, maibé ne’e totál Orsamentu Jerál Estadu hamutuk mak 1.66. Orsamentu retifikativu de’it millaun 400 resin ne’e mós osan barak mai ona hosi OJE, tanba ne’e osan foun maka milloen 200 resinʺ, esplika Xefe Ezekutivu ba jornalista sira hafoin hasoru Xefe Estadu.

Orsamentu Retifikativu ne’ebé propoin ho planu selu salariu membru governu, selu projetu infraestrutura 140 resin no seluk tan.

Enkontru ne’e, Xefe Governu mós informa lei organika governu dahituk nian hodi fó kompeténsia ba ezekutivu hodi implementa programa durante mandatu.

ʺOhin loraik sei haruka mai Prezidente Repúblika (lei organika) atu halo apresiasaun hodi promulgaʺ, hatutan.

Jornalista: Agapito dos Santos | Editora: Rita Almeida

Foto: Primeiru Ministru, Marí Bin Amude Alkatiri, ohin relata proposta Orsamentu Retifikativu ba Prezidente Repúblika. Foto mídia PR