Stanley
Ho, magnata jogu nian, nia oan-feto Sabrina Ho konsidera ona iha loron-sesta
ne'e katak Timor-Leste fó potensial boot no oportunidade sira investimentu
nian, hodi haree katak hanesan importante investe iha edukasaun ho harii
kondisaun sira hodi atrai empreza sira ba nasaun.
"Iha
posibilidade barak investimentu nian iha Timor-Leste. Nasaun iha potensial
maka'as maibé prezisa baze balun, iha parte lejislativu no mós iha
edukasaun", Sabrina Ho hatete ba Lusa, iha Perth, hafoin enkontru ida ho
primeiru-ministru timoroan, Mari Alkatiri.
"Alternativu
lalaias ida maka bele aposta iha hili eskritóriu sira no sede virtual sira hosi
empreza sira, hanesan halo ho British Virgin Islands. Iha empreza sira ne'ebé
iha susar maka'as hodi hetan lisensa sira iha Xina, hanesan ezemplu, no bele ba
Timor-Leste", nia afirma.
Iha
faze dahuluk maski ladún iha impaktu, nia defende katak ne'e sei permiti atu
empreza sira no korporasaun sira "koñese nasaun no hahú fiar",
nune'e, iha prazu médiu bele lori "liután dezenvolvimentu".
Iha
área jogu, Sabrina Ho esplika ona katak presiza "hatene loloos kuadru
lejislativu" hodi konsidera katak hanesan importante avansa ho programa
boot ida hosi edukasaun profisional no téknika.
Iha
enkontru ne'ebé halo ho Mari Alkatiri, Sabrina Ho ko'alia mós kona-ba nia knaar
hanesan Parseira Estratéjiku hosi UNESCO, ne'ebé nia hakarak buka apoia hosi
empreza sira no korporasaun sira hodi apoia programa sosial sira iha nasaun
sira ne'ebé iha dezenvolvimentu ka pós-konflitu.
"Ami
ko'alia ona kona-ba kestaun estratéjiku sira, hosi reforsu ba empregu, hosi
reforsu ba edukasaun, hodi buka insisti iha igualdade jéneru nian", nia
hatete hanesan ezemplu.
Enkontru
entre personalidade na'in rua akontese iha marjen hosi Konferénsia Rejional
hosi Ázia-Pasífiku (APRC, iha sigla inglés) ne'ebé nia abertura ofisial sei
hetan intervensaun hosi Mari Alkatiri, hosi nia homólogu australianu, Malcolm
Turnbull, no hosi prezidente alemaun Frank-Walter Steinmeier.
SAPO
TL ho Lusa
Sem comentários:
Enviar um comentário