LERE: Diak liu fo ba Maioria mak ukun para lalika iha problema

(viola konstituisaun artigi 146 no saida los maka General ninia intensaun ho ida ne’e)

Husi: Alberto Soares Menezes* | opiniaun

Tuir Ami nia hare primeiru General ninia intensaun lolos maka, komesa atu halo ona kampanha eleitoral ba povo Timor-Leste katak iha eleisaun mai tenke fo de’it ona ba Fretilin para bele hetan maioria atu nune’e lalika koliga tun koliga sae. Maibe senhor general mos labele haluha katak F-FDTL labele iha opiniaun politika sira hanesan ne’e tamba tuir konstituisaun artigu 146 numeru 3 nebe dehan nune’e FALINTIL-FDTL labele iha partidu polítiku no rona de’it ba órgaun soberanu kompetente sira, tuir Lei-Inan no lei, no sira labele halo intervensaun polítiku naran ida.

Ho ida ne’e ami nia hanoin katak senhor general bele hanesan fo sugestaun de’it ba povu Timor-Leste mesmu assim halo ona intervensaun ba politika ne’ebe agora dadaun la’o iha rai laran. Senhor general wainhira hakarak ko’alia politika tenki sai husi kargu general atu nune’e bele tama iha vida politika hanesan general Taur Matan Ruak ne’ebe halo ona antes iha 2011.

Nune’e mensagem general ninia ne’e refleta posibilidade rua:

Ema hotu-hotu sei hanoin katak General suporta ona AMP, ne’ebe durante ne’e ema bolu dehan maioria. Ne’eduni wainhira general ninia deklarasaun hanesan ne’e entaun provoka ema nia hanoin atu la’o ba ne’eba no hanesan ami koalia ona katak general ne’e labele interven iha politika tamba kaer kro’at nasaun nian.

Iha fatin seluk mos Ema hotu hatene katak general ninia esposa oras ne’e dadaun hanesan deputada Fretilin ida iha PN ho ida ne’e wainhira atu sugere ba povu katak di’ak liu fo de’it maioria ba partidu ida ne’e hatudu katak general halo ona kampanha eleitoral afavor ba Fretilin ne’ebe lidera governu ho minoria. Ida ne’e hatudu ona violasaun ba dever imparsialidade no prinsipiu apartidariu ba membru F-FDTL no PNTL Timor nian.

Ho ida ne’e mi nia sugestaun de’it katak ba oin wainhira jornalista sira husu Senhor general ninia statement kualquer konaba assunto politiku diak liu liga fali ba asunto seluk tamba nune’e bele assegura kredibilidade no imparsialidade F-FDTL nian iha pais ida ne’e.

*Alberto Soares Menezes
Maloa, Ailok Laran Dili, Timor-Leste