Situasaun Politika Komesa Impaktu Ba Ekonomia

DILI – Situasaun politika neebe lao iha rai laran, komesa ona fo impaktu ba ekonomia, tanba osan iha merkadu agora komesa menus.

Lia hirak nee hatoo husi Xefe Bankada Fretilin Francisco Branco katak, haree ba situasaun politika lao hanesan nee deit, impaktu tebes ba ekonomia, hanesan agora impaktu nee komesa mai dadauk ona, ba iha merkadu.

Impaktu nee hatudu husi osan iha merkadu komesa menus ona. Tanba nee mak Ministru Finansas mos foin lalais nee hatete, estadu Timor-Leste nia kresimentu ekonomia komesa tuun ona ba zero pursentu. Liu-liu ba povu sira neebe mak faan produtu ladun folin ona, tanba ema neebe atu ba sosa mos komesa menus,” katak Branco ba STL Kuarta (10/01/2018) iha PN.

Nia hatete, presiza inzeta osan, se  inzeta osan iha 100 millaun sei iha provoka kresimentu, tanba Orsamentu Ratifikativu  (OR) lapasa, neebe bele hamosu situasaun ekonomia bele tama iha resesu.

Iha parte seluk, Deputadu husi Bankada PLP Mericio Acara hatete, haree ba situasaun politika lao dadaun, mak kontinua lao, nia impaktu direitu ho indireitu nee ba ekonomia nee iha rai laran.

Aleinde nee impaktu mos ba klima investimentu, tanba situasaun lao hanesan nee deit, mak sei laiha investidor ida atu mai investe iha situasaun sira hanesan nee. Nunee mos impaktu ba setor privadu sira atu halao sira nia planu, tanba liga mos ba Orsamentu Jeral Estadu (OJE) laiha oinsa sira atu halo projetu. 

Guilhermina Franco | Suara Timor Lorosae