DILI, (TATOLI) – Vice Prezidente
Partidu Libertasaun Popular (PLP), Fidelis Magalhães, afirma partidu PLP
konkorda ho vontade Primeiru Ministru, Mari Alkatiri atu halo auditoria ba
governu, maibé hein katak auditoria la’ós sai fali fontes ba persegisaun
polítika.
“PLP hein no hakarak duni iha
auditoria, maibé auditoria ne’ebé loloos no labele persege de’it politikamente,
labele sai fontes persegisaun polítika. Tanba ne’e ami hein, ida ne’e ita
hotu nia kompromisu no ami espera bele halo duni,” Xefe Bankada PLP ne’e hato’o
iha nia intervensaun reuniaun dahuluk iha reuniaun komisaun permanente iha sala
plenáriu Parlamentu Nasionál (PN), ohin.
Primeiru Ministru, Marí Alkatiri
hakerek ona karta ba Prezidente ba Tribunál Kontas atuál Prezidente Tribunál
Rekursu (TR), Deolindo dos Santos, atu halo auditoria setór haat hanesan
Rejiaun Administrativu Espesiál Oe-Cusse Ambenu (RAEOA), tezouru (finansas),
infraestrutura no turizmu.
“Horisehik ha’u hakerek ona karta
ba Prezidente Tribunál ba Kontas atu halo auditoria ba RAEOA. Horisehik duni
mós ha’u fó orden para atu kontrata ekipa auditóriu internasionál para halo
auditoria ba tezouru, turizmu no infraestrutura,” Marí hato’o kestaun ne’e ba
jornalista sira iha Palásiu Prezidente Nicolau Lobato, Bairru Pité, Dili, Kinta
ne’e.
Xefe Governu esplika katak setór
haat ne’e maka uluk no hafoin ne’e sei kontinua ba setór sira seluk atu públiku
bele hatene lala’ok ezekusaun orsamentu jerál Estadu. “Sei halo uluk auditoria
ba setór haat ne’e. Labele halo hotu dala ida. Se lae nunka mais hotu,” nia
informa.
Fidelis realsa hikas, se posivel
iha auditoria ne’e bainhira identifika deputadu ida mak involve korrupsaun,
hanesan ukun na’in sira eh mak fó projetu ba malu tenke kehe sai hotu tanba
povu la marees hetan ida ne’e, no la bele uza kargu públiku sai hun ba
korrupsaun.
Tanba ida ne’e Nia iha esperansa
katak auditoria ne’ebé Governu atu realiza labele hare ba se mak halo tanba
tempu ona atu ukun na’in sira responsabiliza aktu sira ne’ebé hanesan
korrupsaun no tempu ba governasaun ida ne’ebé moos.
PLP sei taka matan ba partidu se
de’it mak halo aktu korrupsaun tanba ne’e PLP husu atu audit ne’ebé governu
hakarak halo tenke halo hoo loloos.
Jornalista: Julia Chatarina | Editór:
Manuel Pinto
Imajen: Xefe Bankada Partidu
Libertasaun Popular (PLP), Fidelis Magalhães.
Sem comentários:
Enviar um comentário