Partidu sira ne'ebé iha fatin iha
parlamentu, iha loron-kuarta ne'e, konkorda iha reuniaun ida ho Prezidente
Repúblika hamutuk ho órgaun eleitoral sira, ho kalendáriu ne'ebé hato'o ba
eleisaun antesipadu sira iha Timor-Leste, previstu ba fulan-Maiu.
Reuniaun ne'ebé konvoka hosi
Prezidente Repúblika, Francisco Guterres Lu-Olo, ne'ebé iha semana ne'e karik
sei fó sai loron hodi hala'o votasaun, importante hafoin sobu tiha parlamentu
ne'ebé eleitu iha loron 22 Jullu hodi sai hanesan solusaun ba problema polítiku
iha nasaun.
Bainhira hakotu reuniaun,
responsável partidáriu sira konfirma ona katak aseita proposta sira kalendáriu
nian ne'ebé hato'o hosi Komisaun Nasional Eleisaun (CNE) nian, agora hein de'it
desizaun hosi xefe Estadu.
Alcino Baris, prezidente CNE
nian, konfirma ona katak kalendáriu ne'ebé hato'o kalkula votasaun ba loron 12
Maiu, agora hein de'it Prezidente atu desidi konkorda ho loron ne'e ka la'e.
"Bainhira señór Prezidente
desidi loron, órgaun eleitoral sira prontu hodi implementa kalendáriu
ruma", nia afirma.
José Reis, sekretáriu-jeral
adjuntu hosi Frente Revolucionária do Timor-Leste Independente (Fretilin),
ne'ebé lidera koligasaun Governu nian, hatete ona ba Lusa katak partidu
konkorda ho kalendáriu no loron ne'ebé hato'o.
José Reis, konsidera iha fundu
sufisiente hodi hala'o asaun eleitoral, maski iha rejimi duodesimal ne'ebé
hala'o dezde loron 01 Janeiru, destaka ona maturidade ne'ebé maka populasaun,
"liuliu joven sira", hatudu daudaun iha fulan hirak ikus ne'e iha
Timor-Leste.
Dirijente hosi Fretilin salienta
faktu katak partidu tomak aseita desizaun ne'ebé maka hili hosi Prezidente
Repúblika, hodi kritika katak pré-kampaña sei marka ho insultu sira no
tentativa sira hodi fahe sosiedade.
"Hanesan laiha
responsabilidade no la kontribui. Laiha ona argumentu sira seluk no tenta fahe
ami. Agora problema la'ós frente armada ka diplomátika, maibé maka hadi'a
kondisaun sira hosi povu nia moris no nasaun nian", nia afirma.
Kona-ba aliansa hosi partidu sira
opozisaun nian, José Reis konsidera katak hanesan "plataforma
kontraditóriu" ida, hodi hanoin kona-ba pozisaun sira partidu sira hatudu
ona iha kampaña ba votasaun iha tinan liubá.
"Ba ami, ne'e sei hanesan
referendu ida ba programa hosi Governu dahitu nian no ho programa ne'e maka ami
bo votu", Reis hatete.
Dionísio Babo, responsável hosi
Komisaun Diretivu Nasional (CDN) hosi partidu boot opozisaun nian, Congresso
Nacional da Reconstrução Timorense (CNRT), hatete ona ba jornalista sira katak
nia forsa polítika konkorda ho kalendáriu ne'ebé hato'o.
"Antes ami hato'o mudansa
ruma ba lei ne'ebé hala'o daudaun, maibé hafoin debate ami konsidera katak
hanesan kestaun tékniku sira ne'ebé maka depois bele rezolve", nia
observa.
Babo hatete katak partidu partidu
sei iha programa foun ida, kria hamutuk hosi partidu tolu ne'ebé agora daudaun
iha opozisaun (CNRT, PLP ho KHUNTO) no unidu iha Aliansa foun ba Mudansa ho
Progresu (AMP).
Hatán kona-ba karik pré-kampaña
marka hela ho insultu sira no atake pesoal sira iha rede sosial sira, Babo
hatete katak partidu sei kontinua ho maturidade ne'ebé maka sira hatudu
nafatin.
"Iha fórum balun ne'ebé bele
identifika fásil tebes ne'ebé maka halo daudaun insultu ba ema sira no ba
instituisaun sira. Hosi parte CNRT nian, ami hatudu ona maturidade polítika
antes, durante no hafoin eleisaun tinan 2017 nian, no ami mantén disiplika hodi
la mete iha kampaña sira hanesan ne'e tanba bele estraga kualidade Estadu no
demokrasia nian", nia afirma.
Fidelis Magalhães, xefe hosi
bankada Partidu Libertasaun Popular (PLP), hatete ona katak nia partidu
konkorda ho proposta hosi kalentádiu ne'ebé CNE aprezenta, ho "loron
adekuadu sira hodi hala'o votu transparente ida no profisional".
"Eleisaun hanesan kondisaun
ida importante ba demokrasia ida, no ami iha responsabilidade sira hodi
fasilita kondisaun sira ba ne'e", nia hatete.
Mariano Sabino, ministru Estadu
no prezidente hosi Partidu Demokrátiku (PD) - parseiru Fretilin nian iha
Governu - konfirma mós akordu ho kalendáriu ne'ebé hato'o, hodi afirma katak
eleisaun hanesan dezafiu importante ida ba nasaun.
"Hanesan importante ba
demokrasia, ba kultura demokrátika. Ami tenki garanti atu debate programa sira
kona-ba kondisaun moris populasaun nian", nia afirma.
"Partidu sira tenki asumi
nia responsabilidade iha konstrusaun Estadu nian. Ema rihun 350 mate ona hodi
defende nasaun ne'e, no kontrusaun Estadu nian tenki iha baze iha valor
importante sira", nia hatete.
Sabino kestiona katak sira ne'ebé
hakarak tenta fahe, fila fali ba debate períudu rezisténsia nian hasoru
okupasaun indonéziu no afirma katak ohin loron la importante haree ba pasadu
maibé nesesidade hodi dezenvolve nasaun no hadi'a kondisaun hosi povu nia
moris.
"PD la aseita atu uza
rezisténsia. Frente tolu: armada, diplomátika ho klandestina, hanesan
importante ba independénsia, no labele uza sira hodi haketak malu", nia
afirma.
"Agora ita tenki ko'alia
kona-ba programa dezenvolvimentu nian, hodi moderniza sosiedade, hodi muda
sosiedade", nia hatete no apela ba imprensa hodi ajuda informa populasaun.
Konsidera katak hanesan "triste"
atu gasta "tempu ho osan" iha votu antesipadu, Sabino hatete katak
hanesan importante hodi renova povu nia konfiansa no garanti katak sei ba
kampaña ho programa hosi Governu dahitu nian, ne'ebé maka PD halo parte.
Armanda Berta dos Santos, líder
hosi Kmanek Haburas Unidade Nacional Timor Oan (KHUNTO) konfirma mós katak nia
partidu konkorda ho kalendáriu ne'ebé hato'o no hatutan katak ikusmai maka sei
ko'alia kona-ba programa AMP nian.
SAPO TL ho Lusa
Sem comentários:
Enviar um comentário