Indústria Turizmu Sei Jere Hosi ANT

DILI, (TATOLI) – VII Governu liuhusi Ministériu Turizmu (MT) iha planu atu kria Autoridade Nasionál Turizmu (ANT) atu halo jestaun ba indústria turizmu no rekursu turístika ne’ebé mak iha.

Ministru Turizmu, Manuel Vong afirma, VII governu iha planu atu harii Autoridade Nasionál Turizmu ho responsabilidade atu halo jestaun.

“Ministériu Turizmu tetu no tuir polítika VII Governu atu harii Autoridade Nasionál Turizmu ida ne’ebé ho ninia responsabilidade atu halo jestaun ba ita nia industria turizmu no rekursu turístika ne’ebé mak ita iha”, Ministru Vong informa ba jornalista sira iha serimónia deseminasaun ba polítika nasionál turizmu iha CCD, ohin.

Atu halo jestaun, nia dehan tenke halo dezenvolvimentu no kualifikasaun ba produtus turístiku tomak iha territóriu no halo promosaun no merkadu hodi dada investor sira halo investimentu iha setór turizmu ne’e rasik.

Tanba ne’e, MT agora daudauk prepara hela dekretu lei ida atu asegura polítika nasionál turizmu ne’ebé atu implementa iha tempu naruk ne’ebé investimentu agora daudauk hala’o presiza asegura ninia sustentabilidade.

“Ema gosta mai Timor tanba  rikusoin ne’ebé mak iha hanesan tasi, foho, kultura, fiar nia ema tanba  ne’e Timor hanesan nasaun destinu turístiku foun iha nivel mundiál, liu-liu iha zona Ázia pasífiku konsideradu hanesan destinu turístiku ne’ebé úniku.”

“Ha’u hare katak sei ita laiha órgaun ida ne’ebé jere duni turizmu ne’e, entaun bainhira ministru ida troka bele muda polítika no sakrifika investimentu iha indústria turizmu ne’e rasik.” Manuel Vong fó hanoin.

Autoridade Nasionál Turizmu ne’ebé MT sei kria iha mekanizmu rasik ne’ebé sei estabelese ninia membru kompostu husi setór públiku ne’ebé mai husi Governu no setór privadu ne’ebé mak mai husi hotelaria, restaurante, ajénsia viajen, no parseiru dezenvolvimentu turizmu seluk mak sei hola parte iha autoridade ne’e rasik.

Hafoin ne’e, sei kria mekanizmu ida internal ida iha konsellu jerál ida ne’ebé mak sei halo eleisaun atu hili prezidente atu jere autoridade nasionál ne’e.

Parte seluk Vise Ministru Turizmu, Rui Menezes hateten turizmu tenke sai setór importante ida atu dezenvolve tanba  ne’e halo estudu ba kriasaun Autoridade Nasionál Turizmu tanba  autoridade ne’e importante ba dezenvolvimentu nasionál turizmu nasaun ida ba oin tanba  hanesan órgaun kontrolu no jestaun ba polítika nasionál turizmu.

“Presiza iha autoridade atu halo jestaun ba polítika nasionál atu bele separa polítika operasionál hodi dezenvolve setór turizmu sai setór indústria ida ne’ebé ho karakter tranzversál katak setór turizmu labele la’o mesak, maibé tenke liuhosi parte seluk hanesan edukasaun, agrikultura, infraestrutura no seluk tan ne’ebé iha ligasaun,” Rui observa.

Jornalista: Julia Chatarina | Editór: Manuel Pinto

Imajen: Intervensaun Ministru Turizmu, Manuel Vong iha seremonia Deseminasaun ba Politika Nasional Turizmu iha CCD, ohin. Foto Midia MT/Isac