DILI, (TATOLI) – Veteranu no
eis-kombatente libertasaun nasionál, Cornelio Gama L7 akonsella ba joven sira,
estudante no ema hotu atu koopera nafatin ho Polísia Nasionál Timor-Leste
(PNTL) no FALINTIL-Forsa Defesa Timor-Leste (F-FDTL) hodi kria estabilidade
nune’e dezenvolvimentu bele la’o.
“Joven, PNTL, F-FDTL labele mosu
kualker konflitu, funu hotu ona, labele tuda tuun, tuda sa’e, labele hirus
malu, problema tuur hamutuk rezolve, mai ita unidade, asaun no halo progresu”,
alerta perante estudante no foinsa’e sira besik Arkivu no Múzeu Rezisténsia
Timor-Leste (AMRT), ohin.
Veteranu ne’e mós apela ba
estudante no foinsa’e sira katak hatudu no domin ba rain, estuda maka’as sai
matenek no iha fiar tan maske nasaun ki’ik, maibé fiar malu, hadomi malu, sei
hanesan mós nasaun boot sira.
“Ba joven sira, estudante sira,
estuda maka’as atu bele sai matenek konstrui nasaun, la’ós halimar de’it”.
L7 mós husu ba timoroan sira
tomak respeitu malu nafatin, hadomi malu, maske partidu barak maibé kria
nafatin unidade.
Veteranu ne’e mós halo metafora
katak vitória eh independénsia nu’udar rezultadu to’os no natar basá bainhira
iha fulin, isin no seluk tan mak silu, la rai di’ak no kuidadu, se lahok no sei
terus.
“Ema hothotu responsável, ha’u
husu ba inan-aman sira, maun alin sira, nu’udar to’os no natar, bainhira ita
silu batar tenke rai di’ak, la rai di’ak ita sei terus liliu ba joven sira,
estudante sira, estuda maka’as atu bele sai matenek konstrui nasaun, la’ós
halimar de’it”, nia husu tan.
Jornalista: Rafy Belo | Editora:
Rita Almeida
Imajen: Veteranu no
eis-kombatente libertasaun nasionál, Cornelio Gama, “L7”. Foto FB: Maubere
Gusmão
Sem comentários:
Enviar um comentário