Konstrusaun hosi gazodutu ida ba
Timor-Leste bele iha de'it retornu komersial viável ho "subsídiu
diretu" ida hosi Governu ka hosi parte seluk iha folin dolar biliaun 5,6,
konsidera hosi komisaun ida konsiliasaun ONU nian.
Ne'e hanesan konkluzaun kona-ba
opsaun sira hosi modelu dezenvolvimentu hosi posu sira Greater Sunrise nian
ne'ebé fó sai hosi Komisaun Konsiliasaun ne'ebé halo ona mediasan ba
negosiasaun sira entre Austrália ho Timor-Leste ne'ebé maka hetan ona tratadu hosi
fronteira tasi ne'ebé asina hosi nasaun rua ne'e iha loron-tersa iha Nova
Iorke.
Iha kauza maka opsaun hosi
gazodutu ida hosi Greater Sunrise ba Darwin (DLNG) ka ba súl Timor-Leste nian
(TLNG), ho Timor-Leste simu 80% hosi reseita sira no Austrália 20% iha opsaun
dahuluk ka ida-idak 70% no 30% iha opsaun daruak. Nasaun rua seidauk hetan
akordu kona-ba gazodutu.
"Komisaun konsidera katak
dezafiu ba opsaun TLNG sei hetan nível aseitável ida retornu nian iha projetu
'downstream' bainhira la liu limiti hosi "portajen" ne'ebé konseitu
"upstream" bele suporta", refere hosi dokumentu ida ne'ebé
kompara opsaun rua ne'ebé divulga iha loron-kuarta ne'e hosi Komisaun
Konsiliasaun.
"Komisaun konsidera katak
ne'e bele hetan, maibé ho de'it subsídiu diretu ida ba TLNG hosi Governu ka
hosi parte seluk finansiamentu nian. Komisaun kalkula katak sei presiza
subsídiu diretu ida ba kapital investimentu projetu nian ho folin dolar biliaun
5,6", hakerek iha dokumentu.
Refere, iha prátika, nune'e de'it
maka opsaun TLNG bele garanti folin ida hosi "portajen" ba uzu
gazodutu ho menus dolar rua tuir MMbtu - folin ne'ebé presiza hodi halo projetu
Greater Sunrise sai viável iha ekonomia, haktuir hosi konta sira komisaun nian.
MMBtu hanesan medida ida ne'ebé
aplika iha sistema sira transporte gás natural nian.
Maski nune'e, komisaun hatete
fali katak hanesan "susar sukar loloos efeitu ekonómiku sira boot tebes
hosi opsaun rua ne'e", pozisaun ne'ebé konfirma hosi parte sira.
Dokumentu, divulga iha
loron-kuarta ne'e hafoin asina tratadu fronteira sira nian, hetan krítika
liuhosi karta ida hosi negosiador prinsipal timoroan nian, Xanana Gusmão, ba
Komisaun Konsiliasaun, ne'ebé akuza katak halo liu hosi nia mandatu no halo
rekomendasaun sira ne'ebé konkorda ho DLNG.
"Ami senti triste bainhira
haree diresaun ne'ebé Komisaun hili iha nia análize. La'ós serbisu ho dalan
hanesan no ekilibradu iha konseitu dezenvolvimentu rua, esforsu sira hosi
Komisaun foka liu hodi harii konseitu DLGN (gazodutu ba Darwin), hodi halakon
TLNG (gazodutu ba Timor-Leste)", hakerek hosi Xanana Gusmão.
"Maski nune'e ami enkuadra
(dokumentu sira), aleinde iha falla sériu sira no sala tékniku sira no
ekonómiku fundamental sira, la'ós de'it hanesan rekomendasaun simples ida maibé
hatudu pozisaun parsial loloos ida, halo hodi obriga Timor-Leste desidi
konkorda ho konseitu dezenvolvimentu DLNG nian", nia hatutan.
Iha dokumentu, komisaun argumentu
katak benefísiu sira "sei hetan de'it bainhira hili opsaun ba
dezenvolvimentu rekursu hodi hanoin iha dalan viável ba komérsiu".
No insisti katak "lakohi
halo rekomendasaun ida", maibé oferese de'it "análize komparativu ida
hosi konseitu rua".
Iha opsaun TLNG nian, komisaun
halo lista ba benefísiu hitu hodi subliña katak Timor-Leste "destaka
beibeik katak preokupa liu ho dezenvolvimentu kapital humanu no atividade
ekonómiku iha tempu naruk duké ho reseita imediatu nian".
Kona-ba kestaun katak Timor-Leste
bele hili, ho opsaun TLNG, benefísiu adisional sira ho apoiu ba esplorasaun
"off-shore", komisaun hatete katak empreza petrolíferu sira mós
kompromete ona ba ne'e bainhira hili opsaun DLNG.
Entre benefísiu sira, lista
retornu hosi investimentu iha kapital, efeitu sira "multiplikador iha
atividade hosi petróleu no gás iha Timor-Leste, serbisu sira ba ema timoroan
sira no sosa material sira no fornesimentu lokal sira durante
konstrusaun".
Refere mós empregu hosi ema
timoroan sira iha operasaun hosi infraestrutura sira iha súl nasaun nian - ho
gastu anual kalkula ba dolar millaun 280 - no poupansa to'o dolar millaun 25
tinan-tinan iha folin ki'ik liu hosi produsaun elétriku bainhira muda sentral
sira diesel nian ba gás.
Opsaun sei favorese mós ba
eventual esplorasaun hosi kampu sira seluk iha futuru, dezenvolvimentu hosi
kapasidade sira ho kualifikasaun sira iha área ne'e iha Timor-Leste.
Entre benefísiu sira hosi opsaun
DLNG nian, komisaun destaka reseita adisional sira hosi 10% ba Timor-Leste - ka
entre dolar biliaun 3,13 no 3, 54 resin durante moris projetu nian.
Petrolíferu sira kompromete mós
fó ba petrolífera timoroan Timor Gap to'o 3% hosi kapital grátis no 6% resin
ne'ebé bele sosa tuir dalan komersial, nune'e mós 0,9% grátis no 1,8% resin
selu hosi kapital iha Joint Venture hosi DLNG.
Entre benefísiu hamutuk 14,
inklui mós partisipasaun hosi Timor Gap iha dezeñu, konstrusaun, jestaun ho
operasaun hosi projetu Greater Sunrise, serbisu ba ema timoroan sira no
estabelesimentu hosi unidade fabriku ida no manufaktura ida ho reseita anula
ne'ebé kalkula hamutuk dolar millaun neen.
Kompromisu sira hodi
"aumenta fornesedor timoroan sira" ba projetu, to'o millaun 200 ba
gazodutu doméstiku ida, millaun 50 ba baze apoiu hosi Suai iha nasaun no
fornesimentu gás nian baratu liu ba merkadu doméstiku hanesan benefísiu sira
seluk.
SAPO TL ho Lusa
Sem comentários:
Enviar um comentário