Espoza Prezidente Repúblika (PR),
Francisco Guterres ‘Lú Olo’, Cidalia Mouzinho Lopes Guterres, husu ba pesoal
saúde Hospital Nacional Guido Valadares (HNGV), tenki servisu maka’as hodi
tulun pasiente sira ne’ebé presiza.
Cidalia hateten, pesoal saúde
sira hahú husi Diretor, xefi departementu no funsionariu tenki servisu maka’as
hodi kura pasiente sira liu-liu labarik kiikoan ho idade tinan 10 mai kraik
inklui bebé sira ne’ebé moris ho kondisaun prematura no moris ho kondisaun
prezu la normal atu bele fila lalais ba uma ho kondisaun saúde diak.
”Husu ba ita-nia pesoal saúde
sira, ne’ebé haknaar-an iha HNGV atu bele servisu maka’as liu tan no fo
atendimentu ne’ebé mak diak liu tan ba ita-nia alin, oan sira, liu-liu ha’u
haree iha sala pediatria ne’ebé labarik balun baisa tanba kabun moras, ida ne’e
kestaun ida tanba dala ruma inan sira la fo susuben exluzivu ba oan sira, maibe
sira toman liu fo susuben rahun husi kalen entaun nia konsikuensia mak ne’e,
tanba ne’e inan sira tenki tau atensaun atu bele kontrola nune’e labele hamosu
problema”, Cidalia Mouzinho Lopes Guterres ba Jornalista sira, hafoin hala’o
asaun karidade ba sala pediatria, sala ba bebé prematura, no bebé ho prazu la
normal (malnutrisaun), iha HNGV Kinta (24/8/2018).
Cidalia hateten, objetivu husi
asaun karidade ne’e alende fahe domin ba labarik sira ne’ebé mak moras objetivu
seluk husi asaun ne’e mos nudar asaun kontinuasaun ne’ebé mak sira hahú ona iha
tinan kotuk hodi komemora loron FALINTIL ba dala 23 ne’ebé monu iha loron 20,
fulan Agusto, tinan ne’e.
Diretor Ezekutivu Hospital
Nacional Guido Valadares, Aniceto Barreto, promete sei tau iha konsiderasaun
mensajen espoza PR nian hodi dezenvolve diak liu tan HNGV iha futuru oin mai.
“Hospital ne’e nu’udar hospital
Nasional ne’ebé mak ita-nia maun boot sira sempre fo atensaun tanba ne’e vizita
ne’e mensajen klaru kedan katak ita tenki servisu maka’as hodi hadia buat balun
ne’ebé mak durante ne’e ladiak hodi sai diak liu tan”, Aniceto Guterres
hateten.
Tuir Planu HNGV sei propoin
orsamentu ne’ebé sufisiente ba Ministériu Saúde nune’e bele hala’o andamentu
HNGV ho diak liu tan. Olá
GMN TV | Grupo Média Nacional
Sem comentários:
Enviar um comentário